Райгуырæн бæстæ. Фыдыуæзæг. Ацы дзырдтæй адджындæр, зынаргъдæр нæй адæймагæн. Фыдæлты зæхх йæ удæй фылдæр чи уарзы, йæ райгуырæн къона фыдызнагæй чи бахъахъхъæдта æмæ абон дæр йæ сæрвæлтау цæттæ чи у йæ уд раттынмæ, ахæм фæзминаг, удæй хъæддых адæм бирæ ис не ʼхсæн.
Абон нæ республикæ стыр æргом здахы æфсæддон-патриотон хъомыладмæ. Фæсивæдæн аразынц алыхуызон дæсныйад æвдисæн ахуыртæ, ерыстæ æмæ экскурситæ. Уыдонæй иу у патриотон проект «Верность родине – наша сила!» дæр. Йæ хъуыды у, цæмæй æрбамбырд кæна фараст мин сывæллоны бæрц.
Тæмисчъы фæсивæдæн сарæзтой алыхуызон ерыстæ. Зæгъæм, къордтæй иуы цæуынц тактикон медицинæйы ахуыртæ, иннæйы та специалист манекеныл æвдисы, йæ зæрдæйæ чи бавзæр, уыцы адæймагæн фыццаг медицинон æххуысы æууæлтæ. Ахуыртæ куыд цæуынц, уымæ йæ цæст дардта парламенты сæрдар Тускъаты Таймураз. Суанг ма дзы йæхæдæг архайгæ дæр кодта.
Рæнхъон цæттæдзинад, хæцæнгарзимæ раст архайд, æнæпилот тæхæг аппаратæн разамынд дæттын – ацы ахуыртæм сывæллæттæ тырнынц стыр разæнгардимæ, æмæ сын командир сабыргай æмбарын кæны æппæт сусæгдзинæдтæ. Проект «Верность родине – наша сила!» арæзт у цалдæр къæпхæнæй. Фыццаг – æфсæддон намысы бынæттæ бабæрæг кæнын. Ныридæгæн сæ федтой авдсæдæ скъоладзауæй фылдæр. Ныртæккæ цæуы дыккаг къæпхæн – боныгон уæвыны лагерь.
Дарддæры къæпхæн уыдзæн фæззæджы, фæсивæд ерыс кæндзысты интеллектуалон хъæзтыты. Фарстатæ баст уыдзысты Фыдыбæстæйы Стыр хæст æмæ нырыккон Уæрæсейы историимæ. Уымæй уæлдай ма арæзт уыдзысты сæрмагонд æфсæддон операцийы архайджытимæ фембæлдтытæ.
Æнæмæнг, ахадгæ куыст кæнын хъæуы, цæмæй фæсивæдæн æмбæлгæ уавæртæ уа алы æмвæзадыл дæр. Скъолаты цæуынц, æфсæддон-патриотон хъомыладæн æххуыс чи сты, ахæм мадзæлттæ. Лæппутæ, стæй чызджытæ дæр фæстейы нæ лæууынц, раргом кæнынц, адæймаг цы миниуджытæй фидауы, уыдон: лæгдзинад, уды фидар, фæразондзинад, бахъуаджы сахат де ʼххуыс кæй хъæуы, уый фарсмæ æрбалæууын æмæ йын баххуыс кæнын.
КЪУДУХТЫ Маринæ