Куыд зонæм, афтæмæй ирон номдзыд адæмон поэт, ирон аив литературæйы æмæ æвзаджы бындурæвæрæг, фыццаг ирон профессионалон нывгæнæг, зынгæ æхсæнадон архайæг Хетæгкаты Леуаны фырт Къостайы райгуырдыл 15-æм октябры æххæст кæны 165 азы, æмæ та йæ бирæвæрсыг сфæлдыстады алыварс æрбамбырд кæндзæн, æнæкæрон уарзтæй кæй уарзта, уыцы адæмы. Зынаргъ газеткæсджытæ, нæ газеты фæрстыл цы ног рубрикæ фæзынд, «Къостайы 165 азы бонмæ», зæгъгæ, уым та уын уæ размæ хæссæм, поэтимæ баст чи у, уыцы хъуыдытæ.
Къостайы 160 азы бонмæ Цæгат Ирыстоны мыхуыры рауагътой гыццыл чиныг. Армытъæпæны æнцонтæй цæуы, 5×5 сантиметры йеддæмæ нæу, фæлæ йын цы нысаниуæг ис, уый абарæн ницæимæ ис. Фыст дзы ис æрмæст иунæг æмдзæвгæ – «Ныстуан» – 105 æвзагмæ тæлмацæй. Уымæй уæлдай дзы ис Къостайы конд нывтæ.
Чиныг хаст æрцыд Уæрæсейы чингуыты цыртдзæвæнты реестрмæ. Æмдзæвгæтæ иннæ æвзæгтæм ратæлмац кодтой дунейы алы бæстæты цæрæг ирæттæ. Фондз азы размæ ацы чиныг бирæты зæрдæмæ фæцыд. Æхсызгон лæвар уыд, чингуытæ æмæ Къостайы сфæлдыстад чи уарзы, уыдонæн. Йæ тираж 5 000 экземпляры йеддæмæ нæ уыд æмæ алкæй къухы нæ бафтыд.
2024 азы Къостайы райгуырдыл æххæст кæны 165 азы. Ирон адæмы уарзон поэты кадæн цы мадзæлттæ арæзт æрцæудзæн, уыдонмæ зæрдиагæй æнхъæлмæ кæсæм.
«Къостайæн йæ сис уыд знагæн мыдыбындзы фат, адæмæн та хаста мыд», – загъта Гамзат Цадаса. Къоста – уыцы ном нын нæ зæрдæтæ байдзаг кæны æгæрон сæрыстырдзинад æмæ хъæбулы уарзондзинадæй. Йæ хъуыдытæ æмæ йæ курдиат дзыллæты хорздзинады сæрвæлтау чи снывонд кæны, уыцы адæймаджы ном цæры æнусмæ. Къоста уыд стыр поэт, æмæ йæ поэзийы ирд стъалы абон дæр тæмæнтæ калы дунеон литературæйы сыгъзæрин æвæрæнты.
КЪУДУХТЫ Маринæ