ОБЩЕСТВО

Ирон аив дзырдӕн табугӕнджыты хӕрзиуӕгӕн

Арӕх вӕййы фӕхъусӕн, ома рӕстӕг донимӕ кӕй абарынц, уымӕн ӕмӕ сӕ дыууӕ дӕр ӕнӕрынцойӕ, фӕллад нӕ зонгӕйӕ, тӕхынц размӕ. О, азтӕ бирӕ цаутӕ, бирӕ хъуыддӕгтӕ бӕттынц адӕймагимӕ.

Адӕмӕн  хорзы бацӕуыныл йӕ удӕй арт чи цӕгъды, нӕ иумӕйаг Ирыстоны  ахӕм фӕзминаг хистӕртӕ иу ӕмӕ дыууӕ нӕй. Ахӕм  номдзыд адӕймаг, йӕ фӕстӕ фӕрнӕйдзаг фӕд уадзгӕ чи цӕуы, уыдонӕй иу у мӕ абоны уацхъуыды хъайтар – Плиты Гацыр дӕр.

 

Уый у фӕлмӕнзӕрдӕ адӕймаг. Йӕ цӕст алкӕмӕн дӕр уарзы хорздзинад. Кӕстӕртӕй наукон тӕваг кӕмӕ хӕццӕ кӕны, уыдоныл йӕ фӕлмӕн арм дары ӕмӕ сын ӕххуыс кӕны. Йӕ иузӕрдион, ӕнӕзӕрдӕхудт фӕллойӕ, йӕ зонадон куыстытӕй кады ном скодта йӕхицӕн ӕмӕ Плиты мыггагӕн нӕ, фӕлӕ ӕнӕхъӕн Ирыстонӕн дӕр.

 

Йӕ чингуытӕй, йӕ зонадон уацтӕй, бӕлвырдӕй зыны иу хъуыддаг — ӕнувыдӕй кусы ирон литературон зиууӕтты сфӕлдыстадыл, национ литературӕйы ахсджиаг фарстатыл,  не ‘взаджы фарныл.

 

Плиты Гацыры бирӕ фӕллӕйтты ӕмӕ царды хицӕн хабӕртты тыххӕй иу ӕмӕ дыууӕ хатты нӕ дзырдӕуыд ӕмӕ нӕ фыстӕуыд. Мӕхӕдӕг дӕр ын мӕ фыстыты йӕ ном ӕхсызгонӕй арӕх бахӕссын.

 

Ахуыргонд, ирон литературӕ иртасӕг, филологон зонӕдты кандидат, профессор, Хетӕгкаты Къостайы номыл премийы лауреат Плиты Гаврилы фырт Гацыр райгуырдис 1935 азы 11 июлы Дзауы районы Ручъы хъӕуы, Гацыр йӕ сабибонтӕ арвыста йӕ райгуырӕн хъӕуы. 1953 азы каст фӕцис Ручъы астӕуккаг скъола, стӕй Хуссар Ирыстоны педагогон иснтитут (ныртӕккӕ университет).

 

Йе ‘взонджы бонтӕй абоны онг  кусы Хуссар Ирыстоны паддзахадон университеты, зонгӕ кӕны студенты ирон литературӕйы классиктимӕ ӕмӕ се ‘сфӕлдыстадимӕ. Кӕсы лекцитӕ ирон литературӕйы историйӕ, ирон адӕмон дзыхӕй-дзургӕ сфӕлдыстадӕй, литературӕйы зонынадмӕ бацӕуӕнӕй, аив кӕсын ӕмӕ аив дзурынӕй.

 

Йӕ куысты азты бирӕ бӕрнон бынӕтты фӕкуыста Гацыр. Ӕппӕт фадгуыты дӕр Плийы-фырты цӕсгомджын куысты фӕд бӕрӕгӕй зыны. Егъау у йӕ кад  куыд студентты, афтӕ цы коллективы ‘хсӕн кусы, уыдоны цӕсты дӕр.

 

Плиты Гацыр 50 азӕй фылдӕр кӕны куыд ахуыр-хъомыладон куыст, афтӕ сфӕлдыстадон куыст дӕр. Ахадгӕ у Плиты Гацыры архайд зонады фадыджы дӕр. Йӕ зонадон куыстыты нымӕц хизы 150-йӕ. Мыхуыр сӕ кӕны журналтӕ «Фидиуӕг» ӕмӕ «Мах дуг»-ы, газеттӕ «Хурзӕрин», «Южная Осетия», «Рӕстдзинад», «Стыр ныхас», университеты зонадон уацты ӕмбырдгӕндты.

 

Плийы-фырт студенттӕн бацӕттӕ кодта ӕмӕ мыхуыры рауагъта ахӕм ахуыргӕнӕн чингуытӕ: «Ирон сывӕллӕтты литературӕ», «ХХ ӕнусы ирон литературӕйы истори», «Ирон литературӕйы хрестомати скъолайы кары агъоммӕйы сывӕллӕттӕн», «Ирвӕдӕны зиууӕттӕ», «Дауыт Туаты», «Ирон советон драматурги».

 

Плиты Гацырӕн йӕ бастдзинӕдтӕ егъау сты ирон театры историимӕ дӕр. Дзӕвгар сты йӕ куыстытӕ ирон актерты цард, удыгъӕд, сӕ дӕсныйад ӕмӕ алы къабазы дӕр сӕ бындурон  ахадындзинадыл ныхас кӕм цӕуы, уыцы уацтӕн.

 

Университеты кусгӕйӕ дӕр Гацыр кӕддӕриддӕр ӕххӕст кӕны бӕрнон ӕхсӕнадон куыстытӕ. Абоны бон йӕхи ахсджиаг куысты ӕмрӕнхъ стыр ӕххуыс кӕны журнал «Фидиуӕг»-ӕн, дзӕвгар азты у редколлегийы уӕнг.

 

Гацыры лӕггӕдтӕн стыр аргъ ӕрцыд Республикӕйы хицауады ӕрдыгӕй – 1998 азы йын саккаг кодтой «Республикӕ Хуссар Ирыстоны зонады сгуыхт архайӕджы» кадджын ном, Республикӕйы 10 азы бӕрӕгбоны та хорзӕхджын ӕрцыд кадджын майданӕй, 2004 азы йын лӕвӕрд ӕрцыд кадджын ном «Куысты ветеран», хорзӕхджын ӕрцыд «Хӕлардзинады орденӕй» ӕмӕ майдан «Ирыстоны Намыс»-ӕй.

 

Ныртӕккӕ кусы университеты ирон литературӕйы историйы кафедрӕйы сӕргълӕууӕгӕй.

 

Чиныджы арӕзт, уынд ӕмӕ хуыз кӕд мидисӕй хицӕн кӕнынц цӕмӕйдӕрты, уӕддӕр бирӕтӕ, уыцы нымӕцы ӕз мӕхӕдӕг дӕр, стыр нысаниуӕг дӕттӕм йӕ арӕзт, йӕ уынд ӕмӕ йӕ хуызӕн. Уымӕн ӕмӕ куыд бирӕ ӕндӕр цыдӕртӕ, афтӕ чиныг дӕр йӕхимӕ фыццаг фӕхоны ӕмӕ ӕркӕсын кӕны йӕ хуызӕй.

 

Абон мӕ ныхасы сӕр у, не ‘мбӕстаг, йӕ адӕмы ӕцӕг патриот, бирӕ чингуытӕ ӕмӕ зонадон куыстыты автор, Хуссар Ирыстоны паддзахадон университеты ирон ӕвзаг ӕмӕ литературӕйы историйы кафедрӕйы сӕргълӕууӕг, профессор Плиты Гацыр цы чиныг рауагъта — «Ирон сывӕллӕтты литературӕ», ууыл. Чиныджы рацыд бирӕтӕн, уӕлдайдӕр та ирон литературӕимӕ йӕ хъысмӕт чи сбаста, уыдонӕн, стӕй нӕ университетты ирон факультетты студенттӕн дӕр ӕрхаста стыр цины ӕмӕ ӕхсызгондзинады ӕнкъарӕнтӕ. Ам мӕ банысан кӕнын фӕнды уый, ӕмӕ махӕй бирӕтӕ хорз хъуыды кӕнынц, нырмӕ нӕ полиграфион-кондадон баиугӕнд цы мӕгуырау ӕмӕ ӕгъуыз чингуытӕ уагъта, уый. Ноджы ма йӕ зӕгъон, ацы чиныджы рацыдыл уӕлдай ӕхсызгонӕй ӕмӕ цины ӕнкъарӕнтимӕ ӕмбӕлынц, ирон литературӕмӕ йе ‘ргом чи здахы, ӕнгомдӕр ӕм чи лӕууы, уыдон ӕмӕ университеты студенттӕ. Уымӕн ӕмӕ сӕ иутӕ ӕмӕ се ‘ннӕтӕн дӕр сӕ зонадон ӕмӕ литературон архайдӕн чиныг фӕуыдзӕн стыр ахъаз. Иутӕн феххуыс уыдзӕн сӕ зонадон куыстыты ног факттӕй баххӕст ӕмӕ фӕхъӕздыгдӕр кӕныны хъуыддаджы, иннӕтӕн та фӕахъаз уыдзӕн литературон зонындзинӕдтӕн фидардӕр бындур ӕрӕвӕрынӕн. Куыдфӕнды куы дзурӕм, уӕддӕр чиныгӕн сӕйрагдӕр у йӕ мидис, мидисӕй та ацы чиныг у хъӕздыг. Чиныгмӕ хаст цы автортӕ ӕрцыдысты, уыдон алыварс автор ӕрцӕттӕ кодта хъӕздыг ӕмӕ алыхуызон ӕрмӕджытӕ, ӕнӕмӕнгхъӕуӕг чи у, ахӕм факттӕ. Бӕрӕг у, автор зӕрдиагӕй кӕй куыста ӕмӕ ӕххӕст кодта, йӕ разы цы хӕстӕ сӕвӕрдта, уыцы домӕнтӕ. Ацы дзырдтӕ бафидаргӕнӕн ис чиныджы райдиан разныхасы хъуыдытӕй, зӕгъгӕ, нывӕфтыд литературӕ адӕмы хъомылгӕнӕг у, ӕмӕ ӕмбисондӕн хӕссы ахӕм дзырдтӕ: «Лӕг цалынмӕ цӕра, уӕдмӕ зонды къӕбицмӕ лӕгӕрды».

 

Ирыстоны хъӕбултӕй цъус нӕй, йӕ тыхтӕ ирон литературӕйы чи фӕлвӕрдта ӕмӕ фӕлвары, йӕхицӕн дзы сӕрмагонд бынат чи ссардта, ахӕмтӕ. Уыдонӕй иуты Гацыр бахаста йӕ чиныгмӕ. Куыд, чиныгмӕ хаст чи ӕрцыд уыцы автортӕ, афтӕ ма ӕндӕр ирон фысджытӕй, ӕвӕццӕгӕн, нӕ разындзӕн ахӕм, кӕцы йӕхи нӕ бафӕлвӕрдта сывӕллӕтты литературӕйы. Уыдонӕй бирӕтӕ се сфӕлдыстадон фӕндаг райдыдтой ӕвзонг фӕлтӕрты литературӕйӕ. Иутӕ та сывӕллӕтты литературӕмӕ ӕрбакъахдзӕф кодтой гуырахстджын уацмысты фӕстӕ. Куыдфӕнды ма дзурӕм, уӕддӕр Плиты Гацыр ацы чиныгӕй стыр лӕггад бакодта куыд йӕ адӕм ӕмӕ зонады къабазӕн, афтӕ ирон факультетты студенттӕн дӕр, ирон литературӕйыл дарддӕр хъуыдыгӕнджытӕн. Уырнинаг у, Гацыр цалдӕр азы размӕ йӕ разы цы хӕс сӕвӕрдта, уый ӕххӕст ӕрцыдис, барухс йӕхи зӕрдӕ дӕр ӕмӕ сулӕфыд ӕнцонӕй. Фӕлӕ, ӕвӕццӕгӕн, нӕ вӕййы ахӕм куыст, згъуыд кӕм нӕ уа, уӕлдайдӕр та куыстмӕ критикон цӕстӕнгасӕй куы акӕсай, уӕд, Гацыры зонын рагӕй, ӕртын азы бӕрц. Уал азы адӕймаджы хорз куыд нӕ рахатдзынӕ ӕмӕ базондзынӕ. Базыдтон ӕй хорз ӕмӕ мӕ бон зӕгъын у уый, ӕмӕ кӕд искӕмӕ ис йӕ адӕммӕ, йӕ зӕхмӕ стыр, сыгъдӕг уарзондзинад, уӕд уыдонӕй иу у Гацыр. Ирыстон тыхст ӕмӕ уӕззау уавӕры куы уыдис, уӕддӕр ӕппӕт гӕнӕнтӕ ӕмӕ фадӕттӕй ӕххуыс уыд йӕ адӕмӕн. Чиныджы техникон фиппаинӕгты тыххӕй куы дзурӕм, уӕд мӕ банысан кӕнын фӕнды уый ӕмӕ ахуыргӕнӕндӕтты, сывӕллӕтты литературӕйыл дзырд кӕм цӕуы, ахӕм чиныджы текст фыст хъуамӕ уыдаид ставддӕр дамгъӕтӕй. Ахӕм шрифтӕй фыст хъуыдыйӕдтӕ та фӕллайын кӕнынц цӕстыты ӕмӕ чиныг йӕ къухмӕ чи райсы, уый дзы афӕлмӕцы, райдайы йыл йӕхи тигъ кӕнын. Чиныджы разныхас кӕд егъау нӕу, уӕддӕр дзы цалдӕр ран дзырдтӕ, цӕмӕдӕр гӕсгӕ, хицӕн цӕуынц дефисӕй. Афтӕ чи хъуыды кӕны, ома, уыдон грамматикон рӕдыдтытӕ не сты, уый рӕдийы. Уымӕн ӕмӕ канд литературӕйы нӕ, фӕлӕ алы ран дӕр цыфӕнды уӕлӕнгай нысанӕн дӕр ис стыр нысаниуӕг. Чиныг та адӕмы ахуыргӕнӕг у ӕмӕ дзы чысыл рӕдыд ӕмӕ цухдзинадӕн дӕр бынат ма хъуамӕ уыдаид. Фиппаинаджы хуызы ма мӕ зӕгъын фӕнды: чизоны хуыздӕр уыдаид ӕмӕ чиныгмӕ хаст цы автортӕ ӕрцыдысты, уыдонӕн сӕ уацмыстӕй чиныджы фылдӕр куы уыдаид. Мӕнмӕ гӕсгӕ, уӕд чиныджы ахадындзинад дзӕвгар фӕхуыздӕр ӕмӕ фӕхъӕздыгдӕр уыдаид. Уӕлдӕр банысан кодтон, Ирыстоны бирӕ кӕй сты, сфӕлдыстадон куыст чи кодта ӕмӕ кӕны, ахӕмтӕ. Се ‘ппӕт хаст не ‘рцыдысты Гацыры фыццаг ӕмӕ дыккаг томтӕм. Уырны мӕ, йӕ ацы куысты кӕрон тӕпп кӕй нӕ сӕвӕрдзӕнис, фӕлӕ цы фӕрнджын куыст райдыдта, уый кӕй кӕндзӕнис дарддӕр ӕмӕ ноджыдӕр кӕй барухс кӕндзӕнис ирон, зӕрин дзырды табугӕнджыты зӕрдӕтӕ.

 

КЪУДУХТЫ Маринæ


Похожие записи:

ОБЩЕСТВО 22.11.2023 в 18:00

Открытое первенство и региональный форум

20 ноября во Владикавказе прошло Открытое первенство Республики Северная Осетия – Алания по самбо среди юношей и девушек, а 21 ноября – региональный форум по самбо. Мероприятия приурочены ко Всероссийскому дню самбо и посвящены 85-летию этого отечественного вида спорта.

ОБЩЕСТВО 14.10.2022 в 19:21

Во Владикавказе стартовал отопительный сезон

15 октября 2022 года с 00:00 во Владикавказе начнется отопительный сезон – 2022/23. Соответствующее распоряжение подписано главой АМС Владикавказа.

ОБЩЕСТВО 16.09.2021 в 10:23

Питерские ветераны во Владикавказе

Во Владикавказе находится ветеранская делегация из Санкт-Петербурга. В ее составе – блокадники, Герои Социалистического Труда, капитаны 1-го ранга.

ОБЩЕСТВО 2.12.2021 в 20:47

На “прямой линии” с гражданами

Глава РСО–А Сергей Меняйло провел прямую линию, в ходе которой ответил на вопросы жителей республики.

ОБЩЕСТВО 25.05.2023 в 08:42

Весенний призыв: мифы и реальность

В России продолжается весенняя призывная кампания. Она стартовала 1 апреля и продлится до 15 июля. В этом году призыв в армию как никогда находится под пристальным вниманием общества.

ОБЩЕСТВО 27.01.2023 в 18:58

Такси по-нашему

Новые льготы членам семей мобилизованных, отмена цветовых требований для такси, обучение на дому детей с инвалидностью и квотирование рабочих мест для людей с ограниченными возможностями – эти и другие вопросы были рассмотрены на девятом заседании Парламента РСО-А под председательством Таймураза Тускаева.

Все новости из категории: ОБЩЕСТВО