ОБЩЕСТВО

Сфæлдыста аккаг музыкалон уацмыстæ

Ирон музыкалон аивады рæзтмæ йæ хайбавæрд чи бахаста, йæ уацмыстæй йæ чи фæхъæздыгдæр кодта, уыдонæй уыд композитор, æхсæнадон архайæг Куллиты Леонид Иваны фырт дæр. Уый райгуырд Дзæуджыхъæуы горæты 1916 азы æмæ йе ‘взонджы бонтæй фæстæмæ æнгом баст уыд музыкæимæ. 1930-1963 азты уыд хæдархайгæ аивадон къорды разамонæг. Фæлæ æвзонг музыкант æмбæрста ахуыры стыр ахадындзинад æмæ 1936-1940 азты ахуыр кодта Мæскуыйы консерваторийы композиторон хайады, цыран йæ ахуыргæнджытæ уыдысты профессортæ Е. Голубев, В. Белой æмæ В. Шебалин. 1945-1951 азты уыд Паддзахадон кинематографийы симфонион оркестры нотæты библиотекæйы хистæр. Фæстæдæр, 1952-195 азты уыд ЦИ АССР радиокомитеты зарды ансамблы дирижер, уыд ма Цæгат Кавказы кинохроникæйы студийы музыкæйы фæлындзæг, стæй Дзæуджыхъæуы музыкалон педагогон ахуыргæнæндоны ахуыргæнæг дæр. Композиторты цæдисы уæнг сси 1953 азы.

Хæрзæрыгонæй Куллиты Леонидæн фæбæрæг сты йе ‘взыгъддзинæдтæ музыкæмæ. Кæд ын уавæртæ нæ уыд музыкалон скъолайы ахуыр кæнынæн, уæддæр уый йæхи тыхтæй сахуыр кодта æмæ фæцайдагъ музыкæйыл. Йæхи хъæппæрисæй базыдта цæгъдын цалдæр уадынгæрзтыл, уыцы нымæцы уыдысты мандолин, домрæ, балалайкæ æмæ гитарæ. 14-аздзыдæй кусын райдыдта клубты, разамынд лæвæрдта адæмон инструментты хæдархайгæ ансамблтæн æмæ сын уыд æнтыст. Куллийы фырты фыццаг уацмыстæ уыдысты ирон зарджытæ æмæ кæфтытæ инструменталон бакуыстгондæй. Уый фæстæ азты фæзындысты сюитæ, фантази ирон темæтæ æмæ зарджытыл, куыд Боциты Бароны фыст æмдзæвгæтыл «Хæдтæхæгскъæржжыты марш», «Зонын» (Хетæгкаты Къостайы æмдзæвгæ), афтæ ма «Фынджы зарæг», «Аслæмбеджы зарæг» æмæ æндæртæ. Йæ фыст зарджытæ йын сæ зæрдæмæ арф айстой хъусджытæ, бацыдысты хæдархайгæ хорон коллективты репертуармæ. Композиторы курдиат уæлдай æххæстдæрæй райхæлд, Мæскуыйы консерваторийы курсыты куы ахуыр кодта, уæд. Леонид уыцы азты ныффыста йæ фыццаг хæдбындур, аивадон æгъдауæй зынгæдæр уацмыстæ, куыд музыкæ кинофильмтæн «Цæгат Ирыстон» (1950 аз), «Советон Хуссар Ирыстон» (1951 аз). Кинематографийы Паддзахадон оркестры директор К. Хачатурян фыста, зæгъгæ, ацы куыстыты Куллиты Леонид йæхи равдыста профессионалон æмæ курдиатджын композиторæй.

1952-1954 азты композитор йæ хъусдард аздæхта Плиты Грисы поэзимæ æмæ уæд йе’мдзæвгæты ныхæстæм гæсгæ ныффыста цалдæр вокалон-оркестрон уацмысы, куыд «Ныхас Лениныл». Леониды уацмыстæй иууыл дæргъвæтиндæр уыд сюитæ «Райсом хæхты». Премьерæйы фæстæ уымæн саргъ кодтой, куыд композиторы стыр æнтыст, афтæ. Мæнæ цы фыста ацы музыкæйы тыххæй музыкæзонæг Ю. Кремлев, 1959 азы Цæгат Кавказы композиторты сфæлдыстадон æркасты йæм куы байхъуыста, уæд: «Мæнæн мæ зæрдæмæ тынг фæцыд Куллиты Леониды симфонион пьесæ. Уый уыд поэзийы хæрздæфæй йедзаг. Автор стыр æхсызгонæй ивы æмæ иу кæны темброн ахорæнтæ». Ирон адæмон цуаноны зарæг «Фсати», куыд лирикон зарæг, афтæ фыццæгтæй иу «фехъуыста» Куллиты Л. Фæстæдæр ацы мелоди ахæм хуызы сæ уацмысты равдыстой æндæр композитортæ дæр, куыд Плиты Христофоры оперæ «Къоста», Гæбæраты Ильяйы оперæ «Азау»-ы æмæ æндæртæ.

Йæ царды фæстаг азты Куллиты Л. йæ хъусдард тынгдæр аздæхта цæцæйнаг-мæхъæлон æмæ кæсгон-балхъайраг музыкалон фольклормæ, фыста вокалон музыкæ цæцæйнаг поэтты æмдзæвгæтыл. 1961 азы Грознæйы æххæст æрцыд йæ симфонион уацмыс «Поэмæ Аслæнбег Шериповыл».

Куллиты Леониды уацмыстæ дих кæнынц: солист, хор æмæ оркестрæн, адæмон инструментты хор æмæ оркестрæн, симфонион оркестрæн, адæмон инструментты оркестрæн æмæ æндæртыл. Уыдонмæ ахæссын хъæуы ахæм уацмыстæ, куыд « Райгуырæн бæстæйыл», «Кад партийæн», «Элеги», «Къаннæг сюитæ ирон темæйыл», «Мæздæггаг зилгæ кафт», «Елхоттаг кафт», хонгæ кафт «Замирæ» æмæ æндæртæ.

Куллиты Леонид йæ цардæй ахицæн 1962 азы. Йæ цыбыр царды уый цы зæр-дæмæдзæугæ уацмыстæ сфæлдыста, уыдон ын рох кæнын нæ уадзынц йæ рухс ном.

Хуыбиаты Никъала


Похожие записи:

ОБЩЕСТВО 5.02.2022 в 08:04

Йæ алы нуар дæр кафты æвзагæй кæмæн дзырдта

УФ-йы аивæдты сгуыхт архайæг, Цæгат Ирыстоны адæмон артист. Уарзиаты Хадзысмелы райгуырдыл сæххæст 84 азы

ОБЩЕСТВО 15.04.2023 в 08:22

Лев Лалиев. Дорогой добра и милосердия

Льва Лалиева, председателя Совета ветеранов города Владикавказа, члена Общественной палаты Северной Осетии, человека с неравнодушным сердцем, готового всегда поддержать и прийти на помощь, знают и уважают не только в нашей республике, но и далеко за ее пределами. Он не ждет указаний властных структур, а, оценив свои возможности, старается нести добро людям.

ОБЩЕСТВО 10.12.2022 в 10:48

Научить молодежь жить в мире и согласии

В Северо-Осетинском государственном педагогическом институте состоялась региональная научно-практическая конференция «Межнациональный и межконфессиональный диалог как фактор противодействия экстремистским и террористическим проявлениям в молодежной среде».

ОБЩЕСТВО 13.02.2024 в 09:17

Информационная война против России

События конца ХХ века, последовавшие за развалом СССР, привели к ухудшению состояния русского языка.

ОБЩЕСТВО 18.01.2024 в 09:36

Горный инженер Владимир Куппеев

Имя горного инженера Владимира Куппеева хорошо знакомо многим жителям Колымы, Чукотки и даже Республики Никарагуа. Он – выходец из селения Красногор и один из тех людей, которые глубоко чтят свои корни. Сегодня хотим познакомить с этим уважаемым человеком читателей газеты «Владикавказ».

ОБЩЕСТВО 4.10.2022 в 07:00

Мамытты Ранетæ: «Адæймаг сывæллæттыкуынæ уарза, уæд скъолайы ма хъуамæ куса»

Рагон грекъаг зынгæ философ Сократы хъуыдымæ гæсгæ, ахуыргæнæг йæ курдиат райсы Хуыцауæй. Абон уын мæ уацы цы диссаджы уæздан сылгоймаджы кой ракæнынмæ хъавын, уымæн дæр ахуыргæнæджы курдиат Хуыцауæй ратгæ у.

Все новости из категории: ОБЩЕСТВО