Куыд зонæм, афтæмæй Аланийыл дзуæрттæ куы бафтыдтой, уый мин сæдæ азы бæрæгбонмæ Ирыстоны арæзт æрцыд бирæ алыхуызон мадзæлттæ. Ацы цытджын боны кадæн канд нæ республикæйы нæ, фæлæ ма Уæрæсейы иннæ горæтты ныридæгæн дæр цæуынц фембæлдтытæ. Зæгъæм, æрæджы Мæскуыйы Уæрæсейы æфсæдты централон академион театры иугонд Ирыстоны артисттимæ иумæ кадджын уавæры ацыд тынг аив æмæ зæрдæмæдзæугæ патриотикон изæр «Æмуд адæм иумæ – æмзæрдæ». Уазджытæн нæ республикæйы Сæргълæууæг Сергей Меняйлойы номæй арфæйы ныхæстæ загъта Цæгат Ирыстоны æххæстбарджын минæвар, Уæрæсейы Федерацийы Президенты цур Игорь Барсков.
Фембæлды ма архайдтой паддзахадон камерон хор «Алани», нæ республикæйы адæмон кæфтыты къорд «Хохаг», Уæрæсейы æфсады А.В. Александровы номыл кæфтыты ансамбль, зарæггæнджытæ – Гуцаты Нодар, Цæрикаты Феликс, Бекъойты Вано, трио «Амыран» æмæ иннæтæ.
Уазджытæ кæронбæттæны стыр цымыдисæй федтой Лотиты Игоры нывты равдыст, кæй зæгъын æй хъæуы, йæ темæ уыд Аланийы аргъуыд.
КЪУДУХТЫ Маринæ