Алы чиныджы арæзт дæр кæд уынд, хуыз æмæ мидисæй хицæн кæнынц, уæддæр чиныгкæсджытæ стыр нысаниуæг дæттынц йæ арæзт, йӕ уынд æмæ йе ‘ддаг бакастæй. Уымæн æмæ куыд бирæ æндæр цыдæртæ, афтæ чиныг дæр йæхимæ фыццаг фæхоны æмæ æркæсын кæны йæ хуызæй.
Уæдæ, Бутаты-Хестанты Победæйы ног чиныг дæр йæ къухмæ чи райса, уый йæ æрдæг кастæй нæ ныууадздзæн.
Рухс федта Цæгат Ирыстоны хъуыстгонд журналист Бутаты-Хестанты Победæйы æртыккаг чиныг. Бакæсæн дзы ис автор ирон æвзагмæ кæй ратæлмац кодта, уыцы дунеон литературæйы классикты уацмыстæ. Джек Лондоны радзырдтæ «Фыдæлты сидт», «Цардмæ уарзондзинад», «Мексикæйаг» æмæ «Сылгоймаджы лæгдзинад», Эрнест Хемингуэйы «Зæронд лæг æмæ денджыз», стæй Проспер Меримейы «Маттео Фальконе».
Чиныджы рацыд бирæтæн, уæлдайдæр та дунеон литературæйы классикты уацмыстæ уарзон кæмæн сты, стæй нæ мадæлон æвзагыл кæсын чи уарзы, уыдонæн дæр æрхаста стыр цины æмæ æхсызгондзинады æнкъарæнтæ. Телерадиожурналист Бутаты-Хестанты Победæйы ном хорз зоныныц Ирыстоны.
Бутаты-Хестанты Победæ райгуырд æмæ схъомыл Зилгæйы 1945 азы 9 майы. Цæгат Ирыстоны паддзахадон педагогон институт (ЦИПУ) каст куы фæцис, уæд кусын райдыдта газет «Рæстдзинад»-ы, 1979 азы та Цæгат Ирыстоны радиойы. Уым ирон аив дзырдæн балæвар кодта 50 азы бæрц.
Курдиатджын журналисты æрмдзæф бæрæг дардта кæддæриддæр, æмæ-иу фæндаг ссардта радиомæхъусджытæм. Тынг ын бауарзтой йæ новеллæтæ æмæ очерктæ дæр. Арæх мыхуыргонд цыдысты республикон æмæ районты газетты.
Победæйы фыццаг чиныг «Курдиаты рухс» уагъд æрцыд 2016 азы, дыккаг – «Лæджы фæд а-зæххыл» та 2023 азы фæззæджы.
КЪУДУХТЫ Маринæ