ОБЩЕСТВО

Цы фæцис нæ ирон æфсарм?!

Уæрæсе Украинæйы цы сæрмагонд хæстон операци аразы, уым та Ирыстон дæр æрвылхаттау фæсфæд нæ баззад алы хъуыддаджы дæр. Лигъдæттæн æмбæлон организацитæ рагацау бацæттæ кодтой цæрæн бынæттæ республикæйы санаториты, раиртæстой сын сæ æдасдзинад, техникон уавæр, зынгсирвæзты, уазалы ныхмæ куыд ифтонг сты, уыдæттæ.

 

Ахуырад æмæ Æнæниздзинад хъахъхъæнынады министрадтæ бацархайдтой, цæмæй скъоладзау сывæллæттæ ахуырæй фæсте ма баззайой, медицинон лæггæдтæй ма фæцух уой. Скъоладзауты ’хсæн ис спортсментæ æмæ ныридæгæн тренировкæтæ кæнынц Дзæуджыхъæуы Спорты скъолатæй цалдæры. Кæй фæнды, уыдонæн агурынц куыстытæ. Цæмæй æппæт уыцы лыггæнинаг фарстатæ рæстæгыл аскъуыддзаг уой, уый тыххæй лигъдæтты документтæ цыбыр рæстæгмæ бацæттæ кодта Мидхъуыддæгты министрад.

 

Бизнесы зындгонд центр «Мой бизнес»-ы бындурыл социалон организаци «Мы Вместе» байгом кодта гуманитарон æххуысы пункт. Уырдæм алкæмæн дæр йæ бон у йе ‘ххуысы хай бахæссын. Зæгъæм, дзаумæттæ, сыгъдæгдзинады фæрæзтæ, хъазæнтæ, ахуыргæнæн дзаумæттæ… Ныридæгæн цалдæр уæзласæн машинæ гуманитарон æххуысимæ ацыд Донбассмæ.

 

Уæдæ хæстон сæрмагонд операциты дæр нæ республикæ фæсте нæ баззад. Нæ бæстæйы сæраппонд сæ цард радтой æмæ хъæбатырæй лæгсырдты къухæй фæмард сты Ирыстоны хъæбултæ. Ногæй та цæссыджы суадæттæй раивылд нæ адæмы маст. Фæстаг бонты Ирыстоны дзыллæтæ цæссыгкалгæйæ фæстаг фæндараст загътой Мысыккаты Черменæн, Дзукъаты Хъазыбегæн, Михаил Скоковæн, Хъæцмæзты Артурæн, Олег Ковальчукæн, Железов Александрæн, Сабанты Æхсарбегæн, Мухтаров Асланæн, Козаты Романæн, Игорь Леоновæн, Дмитрий Феденкойæн, Коцты Эльбрусæн æмæ Кирилл Андреевæн. Уыдонæй сæ мæлæты фæстæ Лæгдзинады орденæй хорзæхджын æрцыдысты Александр Железов, Мысыккаты Чермен, Михаил Скоков, Хъæцмæзты Артур, Олег Ковальчук æмæ Игорь Леонов.

 

 Рухсаг ут, хъæбатыртæ! Хуыцау зæгъæд, æмæ уыцы сæрмагонд хæстон операцийы уæ фарсмæ националистты ныхмæ чи тох кодта, уыдон дзæбæхæй сæ хæдзæрттыл сæмбæлой.

 

Кæй зæгъын æй хъæуы, ахæм цардбæллон, сæрæн гуырдтæ сæ бинонтæй, Ирыстонæй кæй фæхъуыдысты, уый стыр хъыгаг у. Судзаггаджы хъар­джытæ та айхъуыстысты Иры уæзгуытæй… Æмæ риссы зæрдæ…

 

Стыр хъыгагæн, Ирыстонæй бирæтæм нæ бахъардтой ацы уæззау зиæнттæ. Уый та бæрæг у, нæ бынæттон радиомæ куы хъусай, уæд сæ хъæлдзæг зарджытæй. Цыма Ирыстоныл иу зиан дæр не ’рцыд, иунæг ныййарæг дæр нæ бацæрæфтыд йæ хъæбулæй, афтæ нæхи дарæм. Кæй зæгъын æй хъæуы, радио нæ сæхгæндзынæ, фæлæ хъæлдзæг зарджытæ баивæн ис хъæбатыртыл.

 

Бынтон диссаг та у нæ транспорт. Маршруткæмæ куы бахизай, уæд вæййы афтæ, æмæ дзы фæбады 2–3 саударæг сылгоймаджы, уымæ нæ кæсгæйæ, шофыртæн сæ музыкæ афтæ хъæрæй вæййы æмæ адæймаг йæхæдæг уыцы саударджыты раз сдыгъуырццæг вæййы. Куы сын бауайдзæф кæнай, уæд æй хуыссын нæ акæндзысты, фæлæ йæ чысыл æрныллæг кæндзысты. Ау, гормæттæ, цы фæцис нæ ирон æфсарм?! Табу Хуыцауæн, бирæ бинонтæ сты æдас ацы фыдбылызæй, сæ сабитæ, сæ фырттæ сты сæ фарсмæ, фæлæ дард, Украинæйы, националистты ныхмæ удуæлдай тох цы лæппутæ кæнынц æмæ кодтой, уыдоны ныййарджытæй цæуылнæ æфсæрмы кæнæм?! Раст у, цард цæуы æмæ Бæсты фарн зæгъæд æмæ йемæ фарн цы хæсса, фæлæ уал абон рæстæг у ахæм, æмæ кæрæдзийы фарсмæ хъуамæ æрбалæууæм. Нæ цин дæр æмæ нæ зиан дæр хъуамæ уа иумæйаг.

ГУЫРИАТЫ А.


Похожие записи:

ОБЩЕСТВО 20.02.2020 в 11:27

Выбор за вами

Этот год начался для жителей нашей страны с ряда важных изменений, одно из них – введение электронных трудовых книжек, которы

ОБЩЕСТВО 15.01.2024 в 19:31

ÆРФÆНЫ ФÆДАУ БÆРÆГ ДАРЫ ЙÆ РУХС ФÆД

Зынгæ ахуыргонд-иранист, филологон зонæдты доктор, профессор, Хуссар Ирыстоны зонæдты сгуыхт архайæг, Хетæгкаты Къостайы номыл паддзахадон премийы лауреат, РХИ-йы Кады ордены кавалер Гæбæраты Никъала Ясоны фырты райгуырдыл сæххæст 100 азы

ОБЩЕСТВО 4.10.2022 в 07:03

Российской армии солдаты!

Профессия водителя является довольно распространенной гражданской специальностью. Однако нельзя обойтись без этой должности и в армии. Эта профессия предполагает не только транспортировку людей и различных грузов, но и ответственность за исправное техническое состояние автомобильной техники.

ОБЩЕСТВО 13.04.2022 в 17:25

Гуманитарный груз для отважных земляков

Депутаты Парламента РСО-А Юрий Габараев, Виталий Чельдиев, Сергей Шаталов, Тотраз Гаев и Тельман Засеев откликнулись на просьбу главы Администрации местного самоуправления г. Владикавказа Вячеслава Мильдзихова и направили гуманитарный груз для ребят из Осетии

ОБЩЕСТВО 22.10.2022 в 07:00

Сердце, отданное городу

Михаилу Шаталову 80 лет

ОБЩЕСТВО 21.10.2021 в 08:01

Майор полиции Батрадз Валиев – «Народный участковый – 2021»

Завершилось онлайн-голосование на звание самого народного участкового Северной Осетии.

Все новости из категории: ОБЩЕСТВО