ОБЩЕСТВО

ДУНЕ АДÆМЫЛ ÆНЦАЙЫ

Хъуыдыгæнæг адæймагмæ æнæмæнг сæвзæры ахæм сагъæссаг фарст: цавæр у мæ царды нысан ацы дунейы? Дзырд дæр ыл нæй, æвæрццаг миниуджытæй хайджын цы адæймаг у, уымæн йæ сæйраг хæс у – æхсæнадон цард фæбæрзонддæр кæнын. Цæмæй адæм хъæздыг кæной – удæй æмæ армæй. Ахæм бæрзонд нысан ын куы нæ уа, йæхицæй дарддæр куы никæмæн ницы ахъаз уа, уæд æхсæнадæй арфæйаг никуы уыдзæн.

 

Ирон адæммæ кæддæриддæр уый тынг фидар æвæрд уыд: хъуамæ дыл адæмы зæрдæ ма фæхуда… Адæм мæ, уæдæ, куыдæй фендзысты, цы мæ зæгъдзысты? Царды хæс æххæст кæнын хъæуы дзыллæйы æфсæрмæй, дæ алыварс адæмæн царды ныфс куыд уай, афтæмæй. Æнæгуырысхойæ, ацы хъуыдыты ис æгъдау æмæ фарны ратæдзæн.

 

Кæй зæгъын æй хъæуы, алкæй бон нæу се ʼххæст кæнын, фæлæ, абон ныхас кæуыл цæуы, уый – Гусаты Агуыбечыры фырт Олег, æххæст кодта ацы дзырдты æцæгдзинад, уымæн æмæ æрдзæй рахаста куырыхон зонд. Куыста бирæ бæрнон бынæтты: уыд Цæгат Ирыстоны арæзтады æмæ архитектурæйы министр, гом акционерон æхсæнад «Промжилстрой»-йы генералон директор.

 

Æмæ кæд адæймаджы æмæ сæргълæууæджы хæстæ исчи рæсугъдæй æххæст кодта, уæд уыдонæн сæ фыццæгтæй уыд Гусаты Олег. О, куыстуæтты директортæ дæр бирæ вæййы, фæлæ дзы адæм хорзы ном раттынц, йæхи дзыллæйы раз хæсджыныл чи нымайы, дзыллæйы мæт æмæ сагъæсæй чи цæры, удæй рæдау чи у, æрмæст уыдонæн. Раст у рагон ирон æмбисонд: «Адæмы цæст уынаг у».

 

Канд Ирыстонæн нæ, фæлæ Уæрæсейæн цы бирæ лæггæдты бацыд, уыдоны тыххæй иу æмæ дыууæ хатты не ʼрцыд хорзæхджын. Уыдонимæ: ордентæ – «За заслуги перед Отечеством» æмæ «За заслуги в строительстве», Уæрæсейы арæзтады къабазы III къæпхæны ветеран, майдан – «Во Славу Осетии», Уæрæсейы æмæ РЦИ-Аланийы кадджын аразæг, уыимæ – бирæ кады гæххæттытæй.

 

Уæвгæ, фæзминаг кæй уыд йæ алы хъуыддаджы дæр, уый тыххæй йæ нæ базыдтой дзыллæ, фæлæ йæ хорз хъуыддæгтæй. Удыкондæй хæрзгæнæг кæй уыд, уымæ гæсгæ йыл тынг æууæндыдысты адæм, æмæ йын æнтысгæ дæр уымæн бирæ бакодта.

 

Бæрнондзинад йæхимæ райсынмæ чи нæ тæрсы, ахæмæн нывгонд вæййы æхсæнады йæ хъысмæт. Бæрнон кусæг, разамонæджы курдиатæй хайджын Чи-иу йæм бахатыд, уыдонæн-иу æнæрхъуыды ныфсытæ никуы бавæрдта, фæлæ уал фарста лæмбынæг равзæрста, уый фæстæ йæ хъару, йæ бæрн кæуыл цыд, уыцы хъуыддаг-иу арæзт æрцыд нысангонд æмгъуыдмæ цыфæнды мадзалæй дæр. Ам та зæгъæн ис, зæгъгæ, дæхицæн, искæмæн аргъ кæныс, уый тынг æнцонæй рабæрæг кæнæн ис: дæ дзырдæн хицау разын, æмæ адæмы хорзæх – дæ хай. Гусаты Олег йæхæдæг куыд куыстуарзаг уыд, куыд æнкъард­та бæрнондзинад йæ алы архайды дæр, афтæ уæлдай аргъ кодта рæстзæрдæ фæллойгæнæгæн, æмæ йæ алыварс дæр уыд ахæм фæзминаг кусджытæ.

 

Ис ахæм адæймæгтæ, æмæ æрмæст йæ цуры куы лæууай, йемæ куы ныхас кæнай, уæддæр дæ тавдзæн йæ уды хъармæй. Олег уыцы фарнæй хайджын уыд, æмæ адæмы тавта йæ уды хъармæй, уыимæ ма йæ бон уыд хъуыддагæй баххуыс кæнын дæр. Йæ къух кæмæн амоны, ахæмтæ гыццыл нæй ныры дуджы, фæлæ дзы стæмтæ сты удæй рæдау, адæмæй фæхицæн вæййынц, æмæ кадджын сты æрмæст сæ бинонты цæсты. Гусаты Олег кæмæн баххуыс кодта, бузныг дзы чи у, уыцы адæймæгтæ тынг бирæ сты.

 

Лæджы цытджын хæс Гусаты Олег æххæст кодта фæрнæй, бирӕтӕн та уыд ныфсы мæсыг æмæ æууæнчы гæнах. Цы ма уа уымæй арфæйагдæр хъуыддаг!

 

Æз та ма уыцы ныхæстæм бафтаудзынæн: цалынмæ царды Гусаты Оледжы хуызæн хæрзгæнджытæ уа, уæдмæ дзы уыдзæн фарн æмæ амонд. Фæзминаг ма уыд æцæг лæджы фæзминаг миниуджытæй, йе ʼгъдауæй, йæ ирондзинадæй.

 

О, адæм сæ хуыздæрты фæрцы адæм сты. Дуне адæмыл æнцайы – ацы ныхас нын баззади фыдæлтæй. Фæлæ цард æвзæртыл куы æнцадаид, уæд раджы фесæфтаид. Уый та цæуыл дзуры? Дуне æмæ цард æнцайынц раст фæллойгæнæг адæймæгтыл. Уыдоны фæрцы бон цæуы æмæ хæссы фарн. Ис æй æндæр хуызы зӕгъӕн дæр: фадат, дам, у аразæг, фæлæ фадæттæн сæхи дæр аразын хъæуы. Гъемæ, ахæм фарнхæссæг адæймаг уыд Гусаты Олег. Уымæн æй дарынц сæ зардыл йе ʼмкусджытæ, йе ʼрвадæлтæ, чи йæ зыдта, уыдон. Хорзы фæд нæ сæфы.

 

Абон, афӕдзы боны та ногæй фемæхсдзысты нæ зæрдæйы цæссыгтæ…

 

Олег, рухсаг у …

 

Бацæттæ кодта Къудухты Маринæ


Похожие записи:

ОБЩЕСТВО 7.10.2023 в 08:57

Коммунальщики готовятся к зиме

«Готовь сани летом» – гласит народная мудрость, которой руководствуются и сотрудники «Спецэкосервиса». На предприятии еще с середины августа идет подготовка к зимнему сезону.

ОБЩЕСТВО 29.07.2022 в 20:47

Лыстæг каст царды æгъдæуттæм æмæ фæзындтытæм, адæймаджы архайд æмæ йæ уды кондмæ

Зындгонд ирон фыссæг Коцойты Бибойы фырт Арсены райгуырдыл сæххæст 150 азы.

ОБЩЕСТВО 10.01.2024 в 20:02

«Минутка добра»

Как важно в современном мире воспитывать в детях верные духовно-нравственные основы! Зачастую родители настолько заняты своими проблемами, работой, карьерным ростом, что не могут выкроить нескольких минут, чтобы поговорить с ребенком по душам, почитать ему книгу, дать элементарные представления о добре и зле.

ОБЩЕСТВО 8.06.2022 в 20:02

Тарифные перипетии. За повышение тарифа на проезд придется ответить

1 июня жителей Владикавказа ждал сюрприз: владельцы десяти маршрутов подняли тариф до 25 рублей. За этим последовала немедленная реакция республиканских властей и требование снизить тариф до привычного уровня.

ГОРОД 18.04.2023 в 09:53

Улица Бзарова

Эта улица, расположенная в Промышленном внутригородском районе Владикавказа, начинается от улицы Остаева и примыкает к улице Иристонской.

ОБЩЕСТВО 25.06.2019 в 10:58

Вперед, к развитию сотрудничества!

21 июня в столице Северной Осетии состоялась Международная конференция «Развитие торгово-экономического сотрудничества между

Все новости из категории: ОБЩЕСТВО