Нæ фидæн, нæ ныфс сты нæ кæстæртæ, фæсивæд. Уыдонæй аразгæ у нæ сомбон. Фæстаг рæстæджы куыд Уæрæсейы, афтæ нæ республикæйы хицауад дæр се ʼргом фылдæр аздæхтой æрыгон ахуыргæндты наукæйы рæзтмæ. Фылдæр кусынц ууыл, цæмæй сæ зонындзинæдтæ æвдисой йæ алы къабазы дæр. Уымæ гæсгæ ис алыхуызон национ проекттæ дæр. Æрыгон ахуыргæндтæн аразынц æппæт фадæттæ æмæ гæнæнтæ, цæмæй рæза сæ наукон куысты ахадындзинад.
Æмæ цалынмæ институтты, фидæны сæ сæр бæрзонд кæмæй хæсдзысты, уыдоны агурынц, уæдмæ уал иннæ æрыгон ахуыргæндтæ æнтыстджынæй сæхи фæлварынц федералон конкурсты. Уымæн æвдисæн – ацы бонты Дзӕуджыхъӕуы цы Æппæтдунеон скъола-конференци цæуы, уый. Йæ темæ та у «Гуманитарон наукæйы нырыккон проблемæтæ».
Гуманитарон наукæйы нырыккон райхалинаг фарстатыл дзурынц æрыгон ахуыргæндты æппæтадæмон скъола-конференцийы. Цæуы Цæгат Ирыстоны гуманитарон æмæ социалон иртасæн институты. Ардæм ныр 18-æм хатт æрбамбырд сты наукон иртасджытæ. Ацы хатт сты Казахстаны, Турчы, Цæгат æмæ Хуссар Ирыстоны, Абхазийы, Ираны, Колумбийы, Мароккойы раззагдæр специалисттæ. Уыдон бакæсдзысты лекцитæ æмæ сараздзысты дæсныйадæвдисæн ахуыртæ. Къабæзтæ сты алыхуызон – истори æмæ этнологи, культурологи æмæ археологи, æвзагзонынад, фольклористикæ æмæ литературæ, политологи æмæ социологи. Иу фæз æрбангом кодта студенттæ æмæ ахуыргæндты. Ахæм мадзал у иунæг æппæт Цæгат Кавказы.
Конференцийы программӕмӕ ма хаст æрцыдысты мастер-кълæстæ дæр.
Конференци дарддæр йæ куыст кæны.
КЪУДУХТЫ Маринæ