Хетæджы кувæндон… Хетæджы къох… Тымбыл хъæды дзуар… Хетæджы Уастырджи… Фæстаг азты Хетæджы Уастырджи сси æппæт ирон адæмы кувæндон, æппæт ирон адæмы дзуар, æппæт ирон адæм сæ зæрдæйы зæрдиагдæр ныхас кæм фæзæгъынц, ахæм бынат. Хетæджы кувæнбонтæ систы нæ адæмы уарзондæр, æхсызгондæр, зæрдæйæн адджындæр бонтæ.
Хетæджы Уастырджи ирон адæмæн у æргом дзуар, æргом сын чи ахъаз кæны, æргом сын сæ фыдбылызтæ чи сафы. Адæм хуымæтæджы нæ фæзæгъынц: «Уастырджи Хетæгæн цы æххуыс бакодта, уыцы æххуыс дын бакæнæд».
Ирыстоны бирæ бæрæгбæттæ ис. Уыдонæй алкæмæн дæр царды ис йæхи нысаниуæг. Фæлæ нæ республикæйы цæрджытæ иууыл ахсджиагдæрыл кæй нымайынц, уыдонæй сæ иу у Хетæджы Уастырджийы бæрæгбон. Сыгъдæг къохы Зæды бон у рæсугъд, адæм стыр кад кæмæн кæнынц, ахæм адæмон бæрæгбон.
Æппæт рæстæджыты дæр нæ республикæйы цæрджытæ ацы бæрæгбонимæ сæ ныфс бастой, сабырдзинад, разыдзинад æмæ сæм æнтыстдзинæдтæ кæй уыдзæн стыр æмæ чысыл хъуыддæгты, уыдæттимæ. Æнусты арфæй цы традицитæ баззад, уыдонæн кад кæнгæйæ, ацы аз æппæтæн уарзон бæрæгбон ногæй иу кæны алы кары адæмты, адæмыхæттыты æмæ алыхуызон динты минæвæртты, цæмæй скувой сабырдзинады, хæстæджыты æмæ хиуæтты фæрныгады, æнæниндзинады тыххæй, æмæ цæмæй бæркад уа нæ хæдзæртты. Уæдæ, цæй, Бæрзондыл бадæгмæ фехъуысæнт сыгъдæгзæрдæйæ æмæ рæсугъд хъуыдытимæ загъд куывдтытæ æмæ фæндтæ, æмæ алы хæдзармæ дæр æрхæссæд амонд æмæ фæрныгад æмæ сæ ног арфæйаг хъуыддæгтæм разæнгард кæнæд.
Хетæджы Уастырджийы кувæндоны бынмæ ныры дуджы сæ кувинæгтимæ цæуынц Ирыстоны æппæт рæттæй дæр: Цæгатæй – Хуссармæ, Хурыскæсæнæй – Хурныгуылæнмæ. Æмæ уый хуымæтæджы нæу: фæдзæхсынц ыл сæ кæстæрты, сæ бæлццæтты, сæ рынчынты, сæ арфæйаг хъуыддæгтæ, сæхи æмæ, куыд æргом зæд у, афтæ сын æргом æххуыс кæны.
Нæ республикæйы цæрæг æппæт адæмты минæвæрттæн дæр ацы рухс æмæ кадджын бæрæгбон ссис традицион æмæ бæрæггонд цæуы канд Цæгат Ирыстоны нæ, фæлæ ма хæстæг æмæ дард фæсарæнты ирон æхсæнадты дæр. Уый нысан кæны, æмæ ирд æвдисæн у нæ иудзинад, хæстæгдзинад æмæ æцæг уарзондзинадæн нæ чысыл райгуырæн бæстæмæ. Хетæджы Уастырджийы бæрæгбон бæрæг кæнын – уый æрмæст ахсджиаг æмæ кадджын æгъдау нæу Ирыстоныл аудæг Зæд, Табуйаг Уастырджимæ скувыны тыххæй, цæмæй дуне сабыр уа, нæ райгуырæн республикæ – фæрнджын, стæй бæркадджын æмæ уазæгуарзон фынгæвæрды тыххæй дæр, фæлæ у стыр бæрнондзинад дæр. Бæрæгбон аккагæй арвитын, нæ фыдæлтæ куыд кодтой, афтæ у алы бинонты, мыггаджы, сыхбæсты хистæры, стæй ацы ахсджиаг æмæ удварны мадзæлтты алы архайæджы хæс дæр.
Уæдæ, цæй æмæ ацы бонты цы куывдтытæ ракæнæм, стæй цы фæндтæ зæгъæм бæрæгбоны сæйраг бынаты – Хетæджы къохы, стæй республикæйы алы хæдзары дæр, уыдон уæнт æвдисæн нæ фыдæлтимæ, нæ ивгъуыдимæ бастдзинадæн. Уымæн æмæ æнæ ивгъуыдæй нæй абон, нæй фидæн.
Кувæндон адæймаджы хъæздыгдзинад æвдисæн бынат нæу! Сыгъдæг зæрдæйæ йæм цæуын хъæуы, дæ бон цæмæй у, уымæй йæ сбуц кæн рæдауæй: æртæ æртæдзыхонæй, бæгæныйы къус æмæ дзыккайæ дæр фæуæд. Нæ фыдæлтæн сæ фылдæрæн сæ кувинаг æрмæстдæр адон уыдысты. Мысайнаг та æвæрдтой æртæ суарийы – 15 капеччы. Ныр дæр æртæ згъæр фондз сомы æгъгъæд сты мысайнагæн.
Гъемæ та сæ Хетæджы Уастырджийы кувæндонмæ куыд зæрдæхæларæй, рæдауæй, куыд хорзæнхъæлæй бахæссæм, уый бæрц нын арфæйаг фæуæнт!
Хетæджы Уастырджийы хорзæх уæ уæд, Ирыстоны цæрджытæ! Хетæджы дзуары кувæндон, Хетæджы Уастырджийы бонтæ систы адæмы иугæнæн бонтæ, нациты кæрæдзиуыл бæттæг бонтæ, æмæ не ‘ппæты дæр йæ хорзæх уæд!