Бæрæгбæттæ бирæ æмæ алыхуызæттæ сты, фæлæ дзы уæддæр ахуыры азы райдианæн æмбал нæй. Зæгъæн ис, æмæ уый канд скъоладзауты рæсугъд бæрæгбон нæу, фæлæ ма адджын æмæ зæрдылдаринаг вæййы хистæр фæлтæрæн дæр. Ууыл цин кæнын æмæ йæ кадджын уавæры нысан кæнын махæй алкæмæн дæр æхцон у, æмæ ахуыргæнинæгтимæ иумæ ахуыры азы æрбалæудыл фæцин кæнæм æмхуызон. Ног ахуыры азмæ та бирæ рæстæг нал ис, æмæ сывæллæтты скъоламæ бацæттæ кæнын бирæ ныййарджытæн у зын, уæлдайдæр та ныры сæрзилæджджын рæстæджы. Ацы æууæл æмбаргæйæ, нæ республикæйы минæвæрттæ архайынц, цæмæй ахæм фæкæсынхъуаг бинонтæм фæдаргъ кæной сæ къух.
Æрæджы сæрмагонд æфсæддон операцийы архайджыты, æфсæддонтæй йæ хæстæ æххæстгæнгæйæ чи фæмард, бирæсывæллонджын æмæ æххуысцух бинонты сывæллæттæ райстой сертификаттæ скъолайы уæлæдарæс балхæнынмæ. Акци уыцы иу рæстæг аразынц цалдæр организацийы: «Адæмон фронт», Ирыстойнаг районы социалон лæггæдты комплексон центр æмæ «Бирæсывæллонджын бинонты иугонд»-ы цæгатирыстойнаг хайад. Æмткæй райсгæйæ, сертификаттæ райстой фæндзай бинонтæ. Уымæй уæлдай ма сабитæн балæвар кодтой ахуырæн хъæугæ дзауматæ.
Ног ахуыры азмæ ног хъуыдытимæ бакъахдзæф кæны скьоламæ алы ахуырдзау дæр, æмæ сын рæсугъдæй сæххæст уæнт!