Цæгат Ирыстоны адæмон инструментты паддзахадон националон оркестрыл – 80 азы
Æвæдза, цас аивадон бынтæ сфæлдисын бантыст нæ фыдæлтæн… Кæд уæззау, зынвадат уыд сæ цард, уæддæр сæ уæгъд нæ уагъта иу ахсджиаг æмæ æнæмæнгхъæуæг хъуыддаг: цард æрмæст иу бонæй нæу, хъуамæ хъуыды кæнай канд дæхиуыл нæ, фæлæ сомбоны фарстатæ скъуыддзаг кæныныл дæр.
Æрмæст аивады дæснытыл цæст ахæсгæйæ дæр мах сæрыстырæй ахъуыды кæнæм, Ирыстоны цудын кæй нæ уагътой, æдзухдæр йæ хæрзæбонæн кæй уыд сæ тырнындзинад, аивады фадыджы размæцыдмæ се ʼххуысы хай кæй хастой æмæ йæ кæй хъæздыгдæр кодтой. Цы уадынгæрзтæ рантыст сæ къухæй, стæй сыл цы диссаджы уацмыстæ сфæлдыстой, уыдон, кæд иууыл нæ, уæддæр нæм абоны бон цы ис, уыдон сты диссаджы хъæздыг æвæрæнтæ.
Ирон уадынгæрзтæй хорз чи цагъта, стæй не сфæлдыстадон къæбицмæ аккаг хуынтæ чи бахаста, уыдоны нымæцы сты: Сланты Гаха, Саулохты Гæбæдз, Къæбысты Баир, Гæззаты Бетъре, Абайты Цицкъа, Джыгкайты Аким, Челæхсаты Пируз, Зыгъуытъаты Бибо, Наниты Андро, Таутиаты Дрис, Гуыриаты Уырысби, Баликъоты Аслæмбег, Бæззаты Майрæм, Джусойты Кудза, Саулаты Дрис, Тобойты Цыцеу, Дзодзыккаты Харитон, Хæдарцаты Эльбрус, Бестауты Серги, Ӕхполӕтты Георги, Темыраты Харитон, Хайманты Афанас, Саппиаты Къола, Абайты Иликъо, Хъыргъаты Габо, Кокойты Таймураз æмæ æндæртæ.
Ирон аивад абон кæй сфæлдыстадæй фидауы, уыдоны нымæцы ис номдзыд фæндырдзæгъдæг, Цæгат Ирыстоны адæмон инструментты паддзахадон националон оркестры аивадон разамонæг Гæздæнты Булат. Ацы бонты йæ номыл национ оркестр кадджын уавæры сбæрæг кодта йе 80 азы. Уый фæдыл Ирон театры уыд стыр, юбилейон концерт.
Музыканттæ ацагътой, бирæ азтæм адæмæн уарзон чи сси, ахæм композицитæ. Хъуыстысты ног уацмыстæ дæр. Сæ иу, маэстройæн йæхи æрхъуыдыгонд – Плиты Грисы поэмæ «Авд цухъхъа»-йæ скъуыддзагæй скодтой музыкалон-поэтикон сценæ. Йе сфæлдыстадон фæндагмæ йын лӕмбынӕгӕй куы æркæсæм, уæд у тынг цымыдисаг. Йæ алы фезмæлды дæр – музыкæ, рæсугъд æмæ зæрдæмæхъаргæ.
Æвидигæ курдиаты хицау Гæздæнты Булат сфæлдыстадæн снывонд кодта йæ цард. Йæ музыкалон сисы бынæй цы уацмыстæ рацыд, уыдонæн фæивддзаггæнæн ницæимæ ис. Сты зæрдæмæхъаргæ, аив. Рухс кæнынц уды рæбинагдæр къуымтæ. Уæдæ уыцы æвæджиауы сфæлдыстад æнæзындгонд нæу нæ республикæйы Парламенты сæрдар Тускъаты Таймуразæн дæр. Цæгат Ирыстоны культурæйы райрæзтмæ стыр æвæрæн кæй бахастой, уый фæдыл оркестры артистты схорзæхджын кодта.
Тускъайы-фырт куыд загъта, афтæмæй Гæздæнты Булат у бирæтæн дæнцæгæн хæссинаг. Уый йæ куыст æмæ сфӕлдыстадӕй æрмæст аивадуарзджыты зæрдæтæ нæ рухс кæны, фæлæ ма бирæ æрыгон фæсивæдæн баххуыс кæны сæ курдиаттæ раргом кæнын.
«Гæздæнты Булат схъомыл кодта, æмæ йæ курдиаты цæхæрæй фæхайджын сты, æмæ йын йæ фарны хъуыддæгтæ аккаг хуызы дарддæр хæццæ кæнынц аивады дæсныты æнæхъæн фæлтæр. Адæмон инструментты оркестр та ма ноджыдæр иу хатт бæрæг кæны йе стыр сфæлдыстадон хъару æмæ æнæкæрон æнтыстдзинæдтæ. Мæ зæрдæ йын зæгъы фидар æнæниздзинад, фæрныгад, бирæ азты цæрæнбон, æнæкæрон сфæлдыстадон уæлахизтæ, – загъта Тускъайы-фырт.
Чи сæ банымайдзæн абон, Гæздæнты Булаты къухæй цас дæсны фӕндырдзӕгъдджытӕ рацыд, уыдоны. Цас æмæ цас ирон фæсивæдæн бауарзын кодта фæндыр. Ныр уыдон фæллой кæнынц нæ бæстæйы алы къуымты. Ноджы фылдæр ма дын бантысӕд, Булат, сфæлдыстадон тыгъдады.
КЪУДУХТЫ Маринæ