Ахуыры аз кæронмæ куыд хæццæ кæны, афтæ скъолаты ахуырдзаутæй бирæтæ ныридæгæн тыхсынц сæ дарддæры дæсныйад равзарыныл. Уымæн æмæ æрлæудзысты ног æмæ ахсджиаг фæндагыл. Хъыгагæн, бирæ хатт авгау лæгъз нæ рауайы, уымæн æмæ фидæны дæсныйад равзарын æнцон хъуыддаг нæу.
Фæлæ нæ уырны, æппæт зындзинæдты сæрты дæр кæй ахиздзысты æнæфæцудгæйæ, уымæн æмæ уый у адæймагмæ æвзæрын кæны сæрыстырдзинады æнкъарæн.
Абон канд хистæркъласонты раз нæ, фæлæ æппæт ахуырдзауты раз дæр ис стыр хæс, цы зонындзинæдты егъау æвæрæнтæ скодтой æмæ кæндзысты дарддæр дæр, уыдон сты сæ царды фыццаг уроктæ. Царды фыццаг сæрмагонд къахдзæфтæ саразынæн, ахсджиаг у уарзон дæсныйад равзарын, зындзинæдтæ иуварс кæнын æмæ фæндвидарæй, хъæддыхæй уæ разылæууæг хæстæ æххæст кæнын.
Ацы ахсджиаг æууæлтыл цыд ныхас æрæджы проект «Лекториум»-ы фæлгæты ахуырадон центр «Вершинæ»-йы Цæгат Ирыстоны паддзахадон университеты ректор, Уæрæсейы наукæты академийы профессор, экономист Огъуаты Алан, æмæ дзы цы ахуырдзау-фæсивæд æрбамбырд, уыдонимæ. Куыд базыдтам, афтæмæй проект сног ис ацы аз. Йæ биографийæ цымыдисаг цаутæ æмæ æнтыстдзинæдты тыххæй ректор радзырдта гом лекцийы архайджытæн. Уымæй уæлдай ма дзырдтой фидæны дæсныйад равзарыныл, уæлдæр ахуыргæнæндоны раззагдæр факультеттыл. Фæсивæдмæ цы фарстатæ сæвзæрд, уыдонæн Огъуайы-фырт радта бæстон дзуаппытæ. Æмбырды архайджытæ уыдысты 70 адæймагæй фылдæр – Дзæуджыхъæуы 7-æм скъолайы ахуырдзаутæ, Беслæны æмæ Горæтгæрон районы фæсивæд. Уыдонæй алкæй дæр фæндыд лекцийы амонæгмæ фарста раттын. Фембæлды архайджыты ныхæстæм гæсгæ, мадзал рауад мидисджын, зæгъæн ис, алчидæр дзы йæхицæн кæй скæндзæн æвæрццаг хатдзæг. Ректоры фæндонмæ гæсгæ, ахæм гом лекцитæ дарддæр арæзт цæудзысты, зындгонд адæм скъоладзаутимæ æмбæлдзысты æппынæдзух.
О, фидæны нæ фæсивæдæй алкæмæ дæр ис йæхи бæллиц, æвзарынц сæ фæндаг сæхи фæндонмæ гæсгæ, фæлæ уыимæ ма тæрсут уæ размæ бæрзонд нысæнттæ æвæрынæй, исут ног зонындзинæдтæ, гом кæнут ног фæндæгтæ. Сæрбæрзондæй хизут æппæт зындзинæдты сæрты дæр, макуы æрхæссут æгаддзинад уæ сæрмæ. Хæлардзинады, æнувыддзинады æмæ аудындзинады æнкъарæнтæ сты царды сæйрагдæр æууæлтæ, æмæ архайут сæ парахат кæныныл – уыдоны мидæг ис уæ дарддæры æнтыстыты æмæ уæлахизты бындур.
Канд уæ ныййарджыты нæ, фæлæ нæ алкæй дæр фæнды, цæмæй уæ равзæрст фæндæгтыл цæуат фидарæй, ныфсджынæй, уымæн æмæ уемæ кусынц иттæг хорз ахуыргæнджытæ, сæ зонындзинæдтæ уын æнæвгъауæй дæтгæйæ. Сымах стут нæ республикæйы фидæн æмæ нæ зæрдæбынæй фæнды, цæмæй уат нæ адæм æмæ нæ республикæйы аккаг фæдонтæ.
Алкæй бон нæу, кæй зæгъын æй хъæуы, ахуыргонд суæвын, фæлæ уæ хъуамæ алчидæр тырна исты хорз хъуыддагыл ныххæцынмæ. Ма уæ уæнт рох, нæ фидæнаразджытæ сымах кæй стут!
КЪУДУХТЫ Маринæ