Ног азӕй ӕхсӕз боны фӕстӕдӕр ирон адӕм бӕрӕг кодтой Доныскъӕфӕнтæ. Ног азы-иу скодтой бирӕ алыхуызон басылтӕ ӕмӕ-иу сӕ Доныскъӕфӕн бонмӕ нывӕрдтой. Райсомраджы-иу ног чындз, хӕдзары ног чындз нӕй, уӕд чызджытӕй, кӕнӕ сылгоймӕгтӕй исчи басылтӕ райста ӕмӕ донмӕ ацыд. Цас раздӕр ацыдаид, цас раздӕр ӕрбахастаид дон, уыйас хуыздӕр. Aдӕммӕ афтӕ каст: Доныскъӕфӕнты дон чи раздӕр ӕрбахӕсса, уыцы бинонтӕ амондджындӕр уыдзысты, уыдоны Хуыцауы хорзӕх уыдзӕн.
Дондзау-иу скуывта, Хуыцау ӕмӕ зӕдтыл-иу бинонты бафӕдзӕхстӕ. Куывта, ӕмӕ йемӕ цы басылтӕ рахаста, уыдоны сӕртӕ уылӕнтӕм ӕппӕрстӕ, зæгъгæ кӕмдӕр цӕрынц доны чызджытӕ ӕмӕ сын барст фӕуӕнт, аз-азы дӕргъы сын сӕ бинонтӕн ӕххуыс кӕнӕнт, хъуаг куыд ницӕмӕй ӕййафой.
Дондзау донмӕ цӕугӕйӕ ӕмӕ фӕстӕмӕ здӕхгӕйӕ дӕр ницы дзырдта. Донӕй-иу хӕдзары пъол, къултӕ ӕмӕ къуымтӕ бапырх кодта. Уыцы донӕй-иу скодтой кувинӕгтӕ, сӕхи дӕр ӕхсадтой уыцы донӕй. Иу ран-иу дзы ныккодтой, ӕфтыдтой йӕм ӕмӕ йӕ азы дӕргъы хардз кодтой.
КЪУДУХТЫ Маринæ