Райсом райдайдзысты Уастырджимæ кувæнбонтæ æмæ уыл рæсугъдæй цæуæнт. Хуыцауы бархъомысæй уæ алкæй цардвæндаг дæр уæд Уастырджийы фæдзæхст. Удæн дæр йæ уæларвон хæс у æнæрынцойæ кусын, гъемæ-иу уæ уды бæркад дæр уæд уæлейæ исгæ, бынæй ахадгæ. Джеоргуыба у лæгты бæрæгбоныл нымад, æмæ уæ хæдзæртты цы нæлгоймæгтæ ис, уыдонæн æххуысгæнæг уæд, дард балцы кæмæн сты, уыдоны йæ рахиз базыры бын бакæнæд. Уастырджи, лæгты дзуар дæ, æмæ Ирыстоны лæгхъуаг макуы ныууадз! Цы кувинёг тæй дын кувдзысты, уыдон дын барст уæнт! Ирон адæмы иугæнæг дæ, сæ хæдзæрттæм сын фарн æмæ амонд хæссыс æмæ сæ дæ хорзæх уæд! Нæ уарзон Ирыстоны зæххыл æнхъæвзæд фæрныгад. Æппæт Ирыстоны бинонтæн та æрхæссæд æнæниздзинад, хæлардзинад, циндзинад æмæ амонд!
Джеоргуыбайы мæйæн йæ æртыккаг къуырийы хуыцаубон у бæрæгбоны райдайæн – хонынц æй Галæргæвдæн. Фæкæнынц кусарт. Джеоргуыбайы хуыцаубон у Хуыцауæн йæ зæхмæ кæсæн бонтæй иу, зæгъгæ, дзырдтой иу нæ фыдæлтæ.
Къуырисæры изæр та вæййы Уастырджимæ кувыны изæр. Алы хæдзары хистæр дæр фæкувы Хуыцаумæ, цæмæй йын йæ бинонтæн æххуыс кæна. Къуырийы дæргъы ирон адæм фæбадынц бæрæгбоны фынгтыл. Дыккаг хуыцаубон у Уастырджийы фæдзæхсæн бон, уый фæстæ къуырисæры та йæ æрвитæн бон. Уыцы бон дæр, хæдзары хистæр бинонты бафæдзæхсы, цæмæй азæй-азмæ бинонтæ уой æнæниз, кæстæртæ амондджын куыд уой. Иннæ аз Уастырджийы номыл стыр кусарт куыд акæной.
Джеоргуыбайы бæрæгбон баст у Уастырджийы номимæ. Уастырджи ноябры мæйы уæларвæй Ирыстонмæ æртæхы йæ урс базырджын бæхыл, æмæ æнæхъæн къуыри Иры дзыллæтæн хорздзинæдтæ фæуары.
Раздæры заманы адæм бынтон æндæр цæстæй кастысты ацы бæрæгбонмæ. Кодтой хъæугуывдтæ, уыдис-иу сæм нывонд гал æмæ кодтой кусарт. Рагацау уагътой арахъхъ, фыхтой бæгæны. Ахæм хæдзар нæ уыд, бæрæгбоны-иу сæрмагонд кусарт чи нæ акодтаид. Ныры дуджы уавæр фæивта, стæм хъæутæй фæстæмæ хъæугуывдтæ нал кæнынц. Бирæтæн сæ къухы не ‘фты кусарт акæнын, фæлæ уæддæр сæ бæрæгбоны фæдыл балхæнынц æртæ фæрсчы æмæ батабу кæнынц Уастырджимæ. Нæ республикæйы цы æндæр адæмы хæттытæ цæры, уыдоны цæсты дæр Джеоргуыба кадджын у, æмæ йæм уыдон дæр æрвылаз табу кæнынц. Немæ зæрдиагæй фæкувынц, фæбадынц, фæцин кæнынц. Адæм кæрæдзи хонынц, кæнынц сыхты, хъæуты куывдтæ. Афтæ баззади фыдæлтæй. Фæлæ нын, хъыгагæн, ныры рæстæджы домæнтæ æрбалхъывтой нæ уавæртæ, æмæ-иу кæд, нæ фыдæлтæ хæсты рæстæг сæ царды домæнтæ, сæ фæндтæ дзæвгар æрбалвæстой, уæд ныл абон дæр хуыздæр рæстæг не скодта. Нæй нын бар ацы æвирхъау рæстæг хъал, æнæрхъуыды митæ кæнын.
О, бæрæгбон бæрæгбоны хуызæн хъуамæ уа. Фæлæ нæ фыццаджыдæр хъуамæ рох ма уа, ацы бæрæгбон æрмæст хæрын æмæ нуазынæн кæй нæу. Æппæтадæмон бæрæгбон у. Ма нæ байрох уæнт фæсивæд, сабитæ. Алчидæр хъуамæ йæхи бацæттæ кæна, сæмбæла йыл сыгъдæгæй, хорз зонд, рухс фæндтимæ. Тынг ахсджиаг у, æртæ кæрдзыны чи скувдзæн, уый снысан кæнын. Зонут æй, зæрдæйæ, удыхъæдæй, кæнæ буарæй чъизи адæймаджы куывд Хуыцаумæ нæ хъуысы, цыфæнды дзырдарæхст куы уа, уæддæр.
Хъуамæ кувæм сыгъдæгзæрдæйæ, стæй цы ‘мбæлы, уыцы хойраг æмæ нозтæй.
Уастырджийы бонтæ фæззæгмæ кæй æййæфтой, уымæн дæр ис йæхи нысаниуæг: фæззæгмæ фæвæййынц хæдзарадон æппæт куыстытæ дæр, зæхкусæг вæййы сæрибар, æнцой йæ афæдзы куысты бæркадæй æхцондзинад бавзара, уый фадат ын вæййы сæрибарæй. Чындзæхсæвтæ дæр-иу Уастырджийы бонтæм уымæн кодтой. Уастырджийы бонты агъоммæ дыууæ къуырийы раздæр-иу райдыдтой къайон цардимæ баст æгъдæуттæ аразын: чызджы бинонтæм минæвæрттæ æрвитын, хæдзаруынæг цæуын, нысан уадзын, ирæды куывд. Архайдтой, цæмæй-иу Джеуæргуыбамæ æрæййæфтаиккой чындзæхсæвтæ, уымæн æмæ, дам, Уастырджийы бонты чындзæхсæв цы дыууæ æвзонг адæймаджы скæной, уыдон уыдзысты иууыл амондджындæр.
Цæмæй ацы ахсджиаг хъуыддагмæ адæм тагъд-тагъдæй ма цæттæ кæной, цæмæй алы бинонтæн дæр уа фаг фадат æмæ рæстæг иумæ æрбамбырд уæвынæн, уый тыххæ та ныр дæр Цæгат Ирыстоны ацы бæрæгбæтты райдайæн, къуырисæр (21.11.2022), у нымад æнæкусгæ улæфты боныл.
Джеоргуыбайы хорзæх уæ уæд!