Фæцис ахуыры аз. Хистæр кълæсты рауагъдонтæ æрлæууыдысты ног æмæ ахсджиаг фæндагыл. Хъыгагæн, бирæ хатт авгау лæгъз нæ рауайдзæн, уымæн æмæ фидæны дæсныйад равзарын æнцон хъуыддаг нæу. Цæвиттон мæ æрхæссын фæнды мæхицæй. Æз мæ дæсныйад равзарыныл бирæ нæ хъуыды кодтон. Романтикон кæй фæхонынц, ахæм мæм кæддæриддæр каст журналисты дæсныйад.
Кæй зæгъын æй хъæуы, уыцы куысты цы стыр зындзинæдтæ æмæ бæрнондзинад ис, уый фыццаг мæ хъуыдыйы дæр нæ уыд. Афтæ мæм каст, æмæ исты газеты æрмæг дæ ном æмæ мыггагимæ куы рацæуа, уæд уымæй хуыздæр, уымæй бæллиццагдæр хъуыддаг нæй. Адæм дæ зондзысты, аргъ кæндзысты дæ ныхасæн, æппæты фыццаг сын ды хъусын кæндзынæ, цы хабæрттæ цæуы, уыдон.
Æппæт уыдæттæ, кæй зæгъын æй хъæуы, алчидæр æмбары. Фæлæ ма уымæй уæлдай, мыхуыргонд ныхасы тыххæй журналист куыд тынг бæрнон у, уый бамбары, æцæгæйдæр ын газеты æрмæг мыхуыргонд куы ʼрцæуы, уæд.
Æз уый банкъардтон, мæ фыццаг уацхъуыд газеты куы фæзынд, уый фæстæ. Ме ʼмбæлттæ мын арфæгæнæгау дзырдтой, дæ уацхъуыд дын бакастыстæм, зæгъгæ. Мæнæн уый æхсызгон уыд. Фæлæ мын уый фæстæ ахуыргæнджытæй иу афтæ зæгъы: «Де ʼрмæджы ма мæнæ уый тыххæй кæнæ уый тыххæй куы загътаис, уæд бирæ хуыздæр, бирæ ахсджиагдæр рауадаид». Фарста, дам, арфдæр æвзарын хъæуы, уæлæнгай ныхас пайда нæ хæссы. Раст мæм фæкастысты хистæры ныхæстæ, æмæ уæд бамбæрстон, газетæн æрмæг бацæттæ кæнын куыд ахсджиаг æмæ вазыгджын хъуыддаг у, уый.
Цалдæр азы рацыд, мæ фыццаг æрмæг газеты куы ныммыхуыр кодтон, уæдæй нырмæ. Æмæ ныртæккæ текст куы фæфыссын, уæд æппæты фыццаг мæхи фæфæрсын: «Цымæ, исты ферох кодтон, цымæ ма ис, цæй тыххæй хъуыд ныффысын, уый?»
Фæлтæрд журналисттæй мын иухатт иу афтæ зæгъы: «Æрмæг куы ныффыссай, уæд дæ блокноты хъуамæ баззайа, ноджыдæр ма ахæм æрмæджы фаг чи уа, уыйбæрц хабæрттæ».
Раст мæм фæкастысты уыцы ныхæстæ дæр. Журналист хъуамæ зона бирæ, хъуамæ арæхса, цы æрмæг æрæмбырд кодта, уымæй спайда кæнынмæ, раст æй рахæссын газеткæсджыты размæ.
Уымæй уæлдай та хъуамæ тынг хорз зона, æрмæг цы æвзагыл ныффыссынмæ хъавы, уый. Уæвгæ мæм ахæм хъуыдытæ сæвзæры, журналисты дæсныйадыл арæх куы фæсагъæс кæнын, уæд.
Сидын хистæр къласы рауагъдонтæм: журналисты дæсныйад уæ равзарынмæ чи хъавы, уый бæстондæр ахъуыды кæнæд, йæ хæс куыд бæрнон æмæ ахсджиаг у, уæлдайдæр ацы карз æмæ вазыгджын заманы.
Ныр та мæ зæрдæ æппæт рауагъдонтæн зæгъы, æппæты фыццаг, æнæниздзинад. Лæгъз æмæ амондджын уæд уæ фæндаг! Цы рухс бæллицтæ ис уе ʼвзонг зæрдæты, уыдон уын сæххæст уæнт. Макуы æрхæссут уæ сæрмæ æгаддзинад, хъуыды кæнут уæ алы къахдзæфыл дæр.
Алкæй бон нæу, кæй зæгъын æй хъæуы, ахуыргонд суæвын, фæлæ уæ хъуамæ алчидæр тырна исты хорз хъуыддагыл ныххæцынмæ. Ма уæ уæд рох, нæ фидæн аразджытæ кæй стут! Хуры тын – уæ фæндаг!
КЪУДУХТЫ Маринæ