ОБЩЕСТВО

ФЫССÆГ ÆНКЪАРЫ ЦАРДЫ ФÆЗИЛÆНТÆ…

Публицист, прозаик, адӕмон фыссӕг, Цӕгат Ирыстоны фысджыты цӕдисы сӕрдар, Хетӕгкаты Къостайы номыл премийы лауреат Агънаты Гӕстӕныл сæххаст 80 азы

 

Цард цӕуы, ӕмӕ дуг йемӕ хӕссы алыгъуызон ивддзинӕдтӕ. Уыдон бандӕвтой ӕхсӕнадон иумӕйаг цардыл, адӕмы зондахастыл, культурӕйыл ӕмӕ ӕндӕр ахӕмтыл. Цадӕггай адӕмӕн сӕ цымыдис къаддӕр кӕны чиныгмӕ дӕр, уӕлдайдӕр та аивадон литературӕмӕ. Куыд ӕй зонӕм, афтӕмӕй та литературӕ у царды айдӕн. Хъыгагӕн, фӕсивӕд дӕр уӕлӕнгай цӕстӕй кӕй райдыдта аивадон литературӕмӕ кæсын уый мӕгуырау ӕндавы сӕ эстетикон хъомыладыл. Уымӕ гӕсгӕ нын нӕ фысджытӕ нӕ мадӕлон ӕвзагыл цы мидисджын уацмыстӕ балӕвар кӕнынц, уыдон хъӕуы кӕсын ӕмӕ ахуыр кӕнын, цӕмӕй не ’взаг ноджы кӕна тыхджындӕр ӕмӕ аивдӕр.

 

Куыд зонӕм, афтӕмӕй та фыссӕгӕн уымӕй стырдӕр арфӕ нӕй, ӕмӕ дзы куы фӕзӕгъынц, зӕгъгӕ, хорз фыссӕг у, йӕ уацмыстӕ адӕмы зӕрдӕмӕ фӕндаг ссардтой. Уыцы амондӕй хайджын чи фӕцис, уыдоны номхыгъдӕй сӕрбӕрзондӕй фӕлгӕсы Ирыстоны адӕмон фыссӕг, Уӕрӕсейы  фысджыты Цӕдисы уӕнг, зындгонд прозаик ӕмӕ публицист Агънаты Гӕстӕн. Уый нӕ ирон литературӕмӕ бахаста стыр ӕвӕрӕн. У нӕ зындгонддӕр ӕмӕ курдиатджындӕр фысджытӕй иу. Йӕ сисы бынӕй цы уацмыстӕ рацыдысты, уыдонӕн ирон чиныгкӕсӕг кӕны ӕгӕрон аргъ. Гӕстӕн литературӕмӕ бахаста йӕхи ӕнӕбафӕзмгӕ ӕвӕрӕн. Фылдӕр фыссы царды ӕцӕгдзинадыл, бинонты ахастдзинӕдтыл. Йӕ уацмысты ирдӕй зынынц нырыккон дунейы актуалон фарстатӕ. Уымӕ гӕсгӕ, адӕмы зӕрдӕтӕм йе сфӕлдыстад ссардта фӕндаг.

 

Йе сфӕлдыстадӕн ын чи табу кӕны, уыдонӕн та фадат фӕцис йемӕ амбӕлынӕн. Дзӕуджыхъӕуы центрон библиотекӕйы йын кад ӕмӕ радимӕ сбӕрӕг кодтой йе 80 азы юбилей.

 

Фыссӕгӕн арфӕ ракӕнынмӕ ӕрбацыдысты ирон литературӕмӕ куыдфӕндыйы цӕстӕй чи нӕ кӕсы, уыцы адӕм. Сфӕлдыстадон мадзал бацӕттӕ  кодта бынӕттон чиныгдоны бӕстӕзонӕн хайады разамонӕг Дзугаты-Мурасты Риммӕ. Ӕрбамбырд ӕм сты Фысджыты Цӕдисы, Иры Стыр ныхасы минӕвӕрттӕ, горӕты скъолаты ахуыргӕнинӕгтӕ, сфӕлдыстадон къордтӕ, йӕ хӕлӕрттӕ ӕмӕ йӕ бинонтӕ, стӕй йын йе сфӕлдыстадӕн стыр аргъ чи кӕны, уыдон.

 

Библиотекӕйы кусджытӕ бацӕттӕ кодтой Гӕстӕны чингуыты равдыст. Йӕ хӕлӕрттӕ ӕмӕ йын йе ‘мкусджытӕ дзырдтой йе сфӕлдыстады ӕмӕ йӕ царды хабӕрттыл. Бирӕ цымыдисаг темӕтыл цыди ныхас сфӕлдыстадон изӕры. Залы уыд бирӕ адӕм, фӕлӕ сӕ хъуыды уыд иу: фыссӕг ӕнкъары царды фӕзилӕнтӕ, ӕмӕ сӕ хӕццӕ кӕны чиныгкӕсӕгмӕ.

 

Уыдон дзырдтой, зӕгъгӕ, Цӕгат Ирыстоны адӕмон фыссӕг Агънаты Гӕстӕн ирон чиныгкӕсӕджы зӕрдӕмӕ фӕндаг ссардта йӕ фыццаг уацмыстӕй. Ӕрыгон лӕппу уӕвгӕйӕ, цард уыдта цалдӕр фӕлтӕры размӕ, ӕмӕ уымӕ гӕсгӕ абон дӕр йе сфӕлдыстады ирдӕй зынынц ныры лыггӕнинаг фарстатӕ. Литературӕйы тыгъдады йӕ хъӕлӕс айзӕлд 60-ӕм азты. Дыууын фондз аздзыдӕй та рухс федта йӕ фыццаг ӕмбырдгонд «Кӕстӕр чындз». Уый фӕстӕ радзырдтӕ, уацаутӕ, романтӕ…

 

Йӕ алы уацмысы дӕр ӕргом кӕны адӕймаджы удыхъӕд. Фыццаг рӕнхъӕй фӕстаг стъӕлфы онг чиныгкӕсӕджы стыр дисы бафтауы. Хӕларзӕрдӕ ӕмӕ хиуылхӕст, фӕлӕ уыцы иу рӕстӕг у, йӕ хъуыды комкоммӕ чи дзуры, ахӕм адӕймаг.

 

Фӕстӕдӕр куыста Цӕгат Ирыстоны телеуынынады литературон-драмон редакцийы, журнал «Ногдзау»-ы бӕрнон секретарӕй, «Мах Дуджы» сӕйраг редакторы хӕдивӕгӕй. Ирон ӕвзаг ӕрдхӕрӕны ӕвзаг кӕй у, уый тыххӕй абон дӕр тох кӕны йӕ фыссӕн сисы фӕрцы. Йӕ курдиаты цӕхӕрӕй чи райгуырд, уыдон ирон хӕзнадоны сты ӕртын чиныджы онг. Тӕлмацгонд ын сты бирӕ ӕндӕр ӕвзӕгтӕм дӕр.

 

Агънаты Гӕстӕн райгуырд Хъарман-Сындзыхъӕуы. Астӕуккаг скъолайы фӕстӕ бацыд Цӕгат Ирыстоны паддзахадон педагогон институты филологон факультетмӕ. Дыккаг курсӕй йӕм фӕсидтысты ӕфсады рӕнхъытӕм, цыппар азы службӕ кодта денджызон флоты. Уый фӕстӕ та йӕ ахуыр адарддӕр кодта Мӕскуыйы Горькийы номыл литературон институты. Каст ӕй куы фӕци, уӕд сӕздӕхт Ирыстонмӕ. Абон цы Фысджыты Цӕдисы сӕргъы ис, уый уӕнг сси 1976 азы. У бӕстӕйы Фысджыты Цӕдисы уӕнг дӕр. Агънайы-фырт дӕс азӕй фылдӕр фӕкуыста телеуынынады.

 

Фыссӕджы сӕйраг нысан у, цӕмӕй фарн, ӕгъдау ӕмӕ нӕ фыдӕлты ӕнӕмӕлгӕ намыс кӕстӕр фӕлтӕр царды бӕрзӕндтӕм хӕсса. Йӕ уацмыстӕ хаст сты астӕуккаг ӕмӕ уӕлдӕр скъолаты программӕтӕм дӕр. Уый ӕрмӕст фыссӕг нӕу, йӕ сӕйраг куыстӕй фӕстӕмӕ кӕны хъомыладон ӕмӕ ӕхсӕнадон куыст дӕр. Ахсджиаг хъуыддагыл нымайы, рӕзгӕ фӕлтӕрмӕ фыссӕджы курдиат ӕргом кӕнын.

 

Йе ‘мсис хӕлӕртты ныхӕстӕм гӕсгӕ, Гӕстӕн литературӕмӕ бахаста ног улӕфт. Йӕ 80 азы рындзӕй ракӕсгӕйӕ у уӕнгрог, ис ма йӕм бирӕ бӕллицтӕ, ӕмӕ йӕ къухы ӕнӕнизӕй бафтӕнт!

 

О, Агънаты Гӕстӕн фыссы царды ӕцӕгдзинадыл, бинонты ахастдзинӕдтыл, йӕ райгуырӕн Ирыстоныл, алы фӕлтӕрты удварныл. Кӕддӕр фыссӕгмӕ радтой фарста, дӕ сисы бынӕй цы уацмыстӕ рацыди, уыдонӕй дын зынаргъдӕр кӕцы у, зӕгъгӕ? Гӕстӕн загъта, алкӕмӕн дӕр дзы мӕ зӕрдӕйы ис йӕхи бынат. Алкӕцыйы дӕр дзы бавӕрдтон мӕ уды иу хай.

 

Бирӕ арфӕйы ныхӕстӕ загъд ӕрцыди уыцы изӕр фембӕлды. Йӕхӕдӕг куыд зӕгъы, афтӕмӕй йӕ фыццаг хӕсыл нымайы сфӕлдыстады уылты чиныгкӕсӕгмӕ уды ӕмӕ зӕрдӕй сыгъдӕгдзинад фӕхӕццӕ кӕнын. Адӕмы хъуыдымӕ гӕсгӕ йын ӕнтысгӕ дӕр кӕны.

 

Газет «Владикавказ»-ы редакцийы кусджытӕ дӕр зӕрдиаг арфӕтӕ кӕнынц Агънайы-фыртӕн, нӕ зӕрдӕ йын зӕгъы ноджы фылдӕр ӕнтыстытӕ.


Похожие записи:

ОБЩЕСТВО 13.01.2022 в 08:19

Дзаджджын хуынтæ бахаста ирон литературæйы къæбицмæ

85 азы сæххæст ис РЦИ-Аланийы адæмон поэт, прозаик, тæлмацгæнæг, публицист, Хетæгкаты Къостайы номыл

ОБЩЕСТВО 21.03.2022 в 19:02

Четыре команды из Северной Осетии вышли в финал Всероссийского конкурса «Флагманы образования. Школа»

Очный полуфинал Всероссийского про­фес­сионального конкурса «Флагманы образования. Школа» президентской платформы «Россия – страна возможностей» стартовал 18 марта на площадке школы №44 им. В. Кудзоева.

ОБЩЕСТВО 1.07.2022 в 22:00

Летний отдых – в безопасности

Летняя оздоровительная кампания в Северной Осетии в самом разгаре. Особое внимание в летний период уделяется организации досуговой занятости детей-сирот, детей, состоящих на учете в подразделениях по делам несовершеннолетних, детей из многодетных и неблагополучных семей.

ОБЩЕСТВО 11.03.2023 в 08:15

В ГМТ организовали бригаду электриков

Сегодня у молодого поколения наблюдается осознанный подход к выбору будущей профессии и запрос на финансовую самостоятельность.

ОБЩЕСТВО 27.05.2023 в 08:34

Гражданином быть обязан…

В кабинете Тамары Габоевны Кайтуковой, заместителя директора Республиканского дома дружбы народов РСО-А, секретаря-координатора Общественного совета МО г. Владикавказ, стеллажи от пола до потолка забиты стофайловыми папками с информацией о проведенных и планируемых мероприятиях, газетными вырезками, образцами благодарственных писем, анонсов и пригласительных билетов…

ОБЩЕСТВО 8.11.2023 в 18:51

Форум «Россия» открылся в Москве

На площадке ВДНХ в Москве открылась Международная выставка-форум «Россия». Северная Осетия принимает активное участие в мероприятии.

Все новости из категории: ОБЩЕСТВО