Уæрæсейы Федерацийы Хъахъхъæнынады министрад куыд хъусын кæны, уымæ гæсгæ бастдзинады станцы хистæр, прапорщик Джиоты Станислав йæ цардæн тæссаг уавæрты уæрæсейаг дæлхайы сифтонг кодта стабилон бастдзинадæй. «Цæугæдоныл ахизыны тыххæй понтоннон хид аразыны рæстæджы, къорды сæйраг тыхтæй дард уæвгæйæ, Уæрæсейы æфсæдты дæлхæйттæ бахаудтой минометон æхстыты бын. Бацайдагъ сын æнæмсæр хæст украинæйаг националисттимæ.
Джиойы-фырты спутникон ифтонгадимæ машинæ, кæцы дæлхæйтты бастдзинад ифтонг кодта уæлдæрлæууæг штабимæ, бахъыгдард, уырдæм æввахс цы снаряд спырх, уый схъистæй, кæцыйы фæстиуæгæн нал скуыста», – радзырдтой ведомствойы.
Джиоты Станислав хъайтардзинад равдисгæйæ, схызт машинæйы сæрмæ æмæ æрдæг сахатæй фылдæр йæ къухтæй хæцыд, чи азылын уыцы антеннæйыл, цæмæй бахъахъхъæд æрцыдаид спутникы сигнал æмæ уыцы иурæстæджы къухдариуæгад кодта йæ дæлбар уæвæг æфсæддон службæгæнджытыл, кæцытæ йæ цалцæг кодтой ныхмæлæууæджы тыхджын æхстыты бын. «Прапорщик Джиоты Станиславы удуæлдай архайдтыты æмæ экипажыл растæй командæ кæныны фæрцы ифтонг æрцыд æфсæдтыл æдзухон управлени. Уый сын баххуыс кодта ныхмæлæууæджы атакæ æрмæст фæстæмæ аппарынæн нæ, фæлæ ма контратакæмæ рахизынæн», – банысан кодтой Уæрæсейы Федерацийы Хъахъхъæнынады министрады.
Джиоты Станислав хорзæхджын æрцыд æмбæлон паддзахадон хорзæхæй.
***
Уæрæсейы Федерацийы Президент Владимир Путины Барамындмæ гæсгæ, Цæгат Ирыстоны Елхоты хъæуы цæрæг Хуыбылты Арсен хорзæхджын æрцыд Уæрæсейы Федерацийы паддзахадон хорзæх «За заслуги перед Отечеством»-ы цирхъытимæ II къæпхæны ордены майданæй, Харьковы цур горæт Александровск ссæрибар кæныны рæстæджы равдисгæ уæндондзинад æмæ æхсардзинады тыххæй.
Хуыбылты Арсен капитаны цины, ротæйы командиры бынаты, горæт Александровкæйы ссæрибар кæныны рæстæджы равдыста тынг хорз хæстон цæттæдзинад. Нацисттимæ карз тохы фæстиуæгæн æфсæддон службæгæнæг фæцæф æмæ ныртæккæ хос кæнынмæ ис Мæскуыйы, Бурденкойы номыл медицинон центры.
***
Хуссарирыстойнаг æртæ бархионы (сæ «позывнойтæ» Ширим, Радик æмæ Негр), кæцытæ хайад исынц Украинæйы демилитаризаци æмæ денацификацийы фæдыл Уæрæсейы Федерацийы сæрмагонд хæстон операцийы, Волновахæйы мæлæтæй аирвæзын кодтой сылгоймаджы, кæцы авд боны уыд ныккæнды йæхи сæрмагонд хæдзары пырхæнты бын. «Хуыцауы æхсæз къухы æххуысмæ фæзындысты Наталямæ æмæ йæ систой пырхæнты бынæй», – дзуры хуссарирыстойнаг лæппуты сгуыхтдзинады тыххæй Донецкы Адæмон Республикæйы Адæмон Советы депутаты æххуысгæнæг, ацы республикæйы æхсæнрегионалон æфсæддон организаци «Землячество Алании»-йы правленийы сæрдар Бæззаты Еленæ.
«Хæстон архайдтытæ цы регионы цæуынц, уым уыдысты нæ лæппутæ, кæцытæ æххæст кодтой знæгтæй территори асыгъдæг кæныны фæдыл хæстон хæслæвæрд. Хъуыддаг уый мидæг ис, æмæ мын фенын кодтой сылгоймаджы боныг, цыран уый фыста авд боны дæргъы цы уæззау бонтæ æмæ æхсæвтæ æрвыста, уый тыххæй.
Лæппутæ йын æцæгæйдæр бахъахъхъæдтой йæ цард. Наталяйы ныфс нал уыд сæрæгасæй баззайынæй», – загъта Бæззаты Еленæ.
Наталяйы боныджы текстæй, кæцыйы хуссарирыстойнаг бархионтæ систой пырхæнты бынæй: «13-æм мартъи. Хæсты 18-æм бон. 27-æм февралы фæстаг хатт федтон мæ мады. Æмæ ныр æз иунæгæй дæн ныккæнды, кæцыйы рахизæныл æрхауд хæдзары æмбæрзт.
Тырныдтон ныккæнды рахизæн асыгъдæг кæнынмæ, фæлæ æнæхъуаджы, æгæр уæззау разындысты пырхæнтæ, раст мæ цыма барæй бакодтой ныккæнды, уыйау мын рахизæн нал ис. Куыдз æмæ мæм гæды тагъд-тагъд æрбакæсынц хæтæлæй. Æз сын уынын сæ цæсгæмттæ, семæ ныхас кæнын æмæ кæуын. Курын сæ, цæмæй искæмæ æххуысмæ фæдзурой, фæлæ мæ не ‘мбарынц. Дардæй мæм хъуысынц тыхджын æхстытæ. Мæ хæдзары æввахс ныр æртæ боны нал хъуысынц æхстытæ, нал пырх кæнынц минæтæ.
14-æм мартъи. Фæлвæрдтон пъол асæттыныл, цæмæй рабырыдаин, хъæр кодтон, сидтæн æххуысмæ… Ныккæнды хуынкъæй федтон, цыма ма мæ чидæр сæрмагондæй сæхгæдта, цæмæй мæ ма ссарой, уыйау люкыл æркалдысты алыгъуызон пырхæнтæ. Ахæм уæззæуттæ сисын мæ бон нæ бауыдзæн. Тынг бафæлладтæн. Хъуамæ бафынæй кæнон. 13 сахат æмæ 38 минут.
15-æм мартъи. Абон, уый размæ дыууæ боны куыд хурбонтæ уыд, афтæ нал у. Хæтæлмæ хур нæ кæсы. Фæнды мæ хъарм хъæццулы бын хуыссын. Нæй мæм тыхтæ люк бакæнынæн. Сидын æххуысмæ, фæлæ мæ ничи хъусы… 18-æм мартъийы æхсæв уыд сабыр. Нæ йæ зонын, фынæй кæнын æви нæ, уый. Æгъуыссæгдзинад. Хуыцаумæ кувын алкæйы тыххæй дæр. Алцыдæр нырхæндæг, æз дæр тынг æнкъард дæн», – фыссы Наталья.
19-æм мартъи. Сабаты райсомæй раджы тохтæ цыдысты дард ран. 10 сахатыл кæуын æмæ сидын æххуысмæ. Кувын Хуыцаумæ. Æрбацыдысты ирæттæ æмæ мæ аирвæзын кодтой мæлæтæй. Стыр бузныг!», – боныджы кæрон ныффыста сылгоймаг.
КЪУДУХТЫ Маринæ