Стыр аргъ кæны рæстдзинадæн
Афæдзæй фылдæр цæуы сæрмагонд æфсæддон операци æмæ дзы Ирыстоны фæсивæд æвдисынц æнахуыр сгуыхтдзинæдтæ. Ирон лæджы кад, фыдæлты намыс дæлæмæ нæ уадзынц, афтæмæй сæ риуы ʼмбæрц размæ цæуынц фронты раззаг хæххыты æмæ хъæбатырæй дæрæн кæнынц фашист Бандерайы фæдонты. Уæрæсе тох кæны йæ рухс фидæныл. Уымæ тырнындзинадæй нæ хæстонтæ сты ныфсджын æмæ æхсарджын. Æмæ уыцы сæрибардзинады сæрвæлтау Уæрæсе быхсы уæззау зындзинæдтæн, ахæм тыхст бонтæн.
Ахæм карз, удуæлдай тохты æцæг хъæбатырдзинад чи æвдисы, уыдоны æмрæнхъ сæрбæрзондæй фæлгæсы не ʼмзæххон, батальон «Алани»-йы иууыл æвзонгдæр хæстон Остъаты Рустам (фæсномыг «Хъæбул»).
Дзæуджыхъæуы 38-æм астæуккаг скъолайы 11-æм «Б» къласы ахуыргæнинаг Украинæйы сæрмагонд æфсæддон операцийы хæстон архæйдтыты зонæйы уыд цалдæр хатты. Лæппуйы фæндыд йæ фыды фенын, кæцы уым ис сæрмагонд операцийæн йæ фыццаг бонтæй фæстæмæ. Остъаты Руслан (фæсномыг «Скиф») у батальон «Алани»-йы штабы хистæр.
Номхуындæй, уый бацæттæ кодта Рустамы хæстон цæттæдзинадæй, уыимæ, лæппумæ ахæм быхсондзинад, æмæ, сæйраг дæр та – ахæм ныфсджын кæй у, уый, фыццаджыдæр, батальон «Алани»-йы командир Гæбуты Игоры (Русский) руаджы. Цалдæр азы размæ «Зилахар»-ы спортивон хъæзтыты уый Рустамæн балæвар кодта кард. Лæппу хайад иста алыхуызон спортивон ерысты. Æхсæз азы дæргъы та Рустам архайы грекъаг-римаг хъæбысхæстæй. Уый размæ та æртæ азы цыд футболмæ.
«Хæстон цæттæдзинадæй мæ сахуыр кодтой мæ фыд æмæ батальоны командир. Æз Украинæйы арæнмæ куы æрцыдтæн, уæд мæ фыдæн загътон, зæгъын, мæ фæнды нæ лæппутæн баххуыс кæнын æмæ йæм бахатыдтæн, цæмæй мын бар радтаид хæстон архӕйдтыты хайад райсынæн. Уый фæхъуыды кодта дæргъвæтин рæстæг, æмæ мын æппын фæстаг сразы мæ фæндыл», – зæгъы Рустам.
Сæрмагонд æфсæддон операцийы зонæмæ Остъаты Рустам ацыд РЦИ-Аланийы администрацийы æмæ хицауады Сæргълæууæг Гобеты Ибрагимимæ (йæ фæсномыг «Киев»). Йæ хæстон хæстæ æвзонг лæппу æххæст кодта иннæтимæ æмхуызонæй. «Ныхмæлæууæг активонæй размæ бырста, нæ разы лæууыд хæс сæ размæбырст сын фæсыкк кæнын æмæ нæ къухты бафтыд нæ хæслæвæрд æнтыстджынæй сæххæст кæнын», – загъта Остъаты лæппу.
«Нæ йæ уагътам Украинæмæ ацæуын. Мах, йе ʼмкъласонтæ, тынг тыхстыстæм, сæрмагонд æфсæддон операцимæ кæй ацыд, уый тыххæй. Фæлæ нæ æрсабыр кодтой, загътой нын, зæгъгæ, алцыдæр у хорз. Мах сæрыстыр стæм иу къласы кæй ахуыр кæнæм, уымæй», – сæрбæрзондæй дзуры йе ʼмкъласон Бекъойты Аминæ.
Скъолайы директор Сланты Мӕдинӕйы ныхæстæм гæсгæ, лæппу тынг уарзы æмæ стыр аргъ кæны рæстдзинадæн. Бирæсывæллонджын бинонтæн Рустам у хистæр хъæбул. Фыд йæ сывæллæтты хъомыладмæ дары стыр хъусдард æмæ активон хайад исы скъолайы царды.
Уæдæ йын РЦИ-Аланийы Сæргълæууæг Сергей Меняйло дзæгъæлы нæ балæвар кодта Рустамæн йæхи сæрмагонд номылдарæн командирон сахат, кæцыйы йæ къухыл дардта 35 азы дæргъы.
«Уый уыд мæнæн стыр кад æмæ уæлæмхас разæнгардгæнæны æууæл. Сахат дардтон хæстон архӕйдтыты рæстæджы дæр. Абон æфснайд у сейфы», – загъта Остъаты Рустам.
Дзæуджыхъæуы 38-æм астæуккаг скъола схъомыл кодта бирæнымæц лæппутæ-рауагъдонтæ, кæцытæ сæхицæн равзæрстой æфсæддон карьерæ. Скъолайы коллектив сæ у абон уæлдай сæрыстыр.
Остъаты Рустам нырма не сбæрæг кодта йæ фидæны професси, фæлæ, æвæццæгæн, йæ цард сбæтдзæн æфсæддон зонадимæ. Куыдфæнды ма уа, уæддæр Ирыстон ныридæгæн схъомыл кодта райгуырæн бæстæйæн аккаг фырты.
Æрæджы Цæгат Ирыстоны республикæйы сæргълæууæг Сергей Меняйлойы указæй Рустам хорзæхджын æрцыд «Ирыстоны кады» майданæй.
Равдыста сгуыхтдзинад
Уæрæсейаг æфсæддон службæгæнджыты къорд, кæцыйы сконды уыд ротæйы фелсыр, прапорщик Мурацаты Алыксандр, æххæст кодта сæрмагонд хӕслӕвӕрдтӕ цæрæн пункттæй сæ иуы районы.
Бахæсгонд маршрутыл цæугæйæ, Алыксандр хъæды бафиппайдта гæрзифтонг украинæйаг националистты къорды. Нацисттæ сæхи цæттæ кодтой уæрæсейаг æфсæдты фæсчъылдым диверсион архайдтытæ саразынмæ.
Алыксандр æвæстиатæй фехъусын кодта командирæн. Уавæрæн саргъ кæнгæйæ, къорды командир аскъуыддзаг кодта ныхмæлæууæгимæ тохы бацæуын.
Афтæмæй уæрæсейаг æфсæддон службæгæнджытæ бæрæг фæкъаддæр кодтой националистты хæстон фадæттæ.
Тохы рæстæджы, Мурацаты Алыксандр æхстыты бын эвакуаци скодта, чи фæцæф, уыцы хæстонты æмæ сын бакодта фыццаг медицинон æххуыс. Мурацайы-фырты профессионалон архайдтытæ фадат радтой хæстон æмбæлтты цард бахъахъхъæнынæн.