Дзӕуджыхъӕуы Гӕздӕнты Гайтойы номыл фӕсивӕдон республикон библиотекӕйы кӕсӕн залы уыд курдиатджын поэт, публицист, тӕлмацгӕнӕг Бестауты Георгийы тыххӕй фыст Цыбырты Людвиджы чиныг «Шаги в бессмертие»-йы презентаци. Мадзал арӕзт ӕрцыд Ирыстоны фысджыты цӕдисы хъӕппӕрисӕй.
Презентацийы хайад райстой ахуыргӕндтӕ, фысджытӕ, литератортӕ, Цӕгат Ирыстон-Аланийы ӕхсӕнады минӕвӕрттӕ: Агънаты Гӕстӕн, Дзасохты Музафер, Мамиаты Изетӕ, Цомартаты Изӕтбег, Тъехты Тамерлан, Къусраты Анатоли, Гасанты Валери, хуссарирыстойнаг уазджытӕ, кӕцыты ‘хсӕн уыд поэты чызг Бестауты Залинӕ. Фембӕлды мА архайдта сывӕллӕтты ансамбль «Бонвӕрнон», йӕ аивадон разамонӕг Гӕбӕраты Алан.
Ацы аз Бестауты Георгийыл сӕххӕст уыдаид 90 азы. Уый райгуырд 1932 азы 5-ӕммайы Цхинвалы районы Годжитыхъӕуы. Бестау зындгонд уыд, куыд Шота Руставелийы ӕнӕмӕлгӕ поэмӕ «Стайы цармдарӕг»-ы тӕлмацгӕнӕг, афтӕ. Уый ма гуырдзиаг ӕвзагӕй тынг хорз ратӕлмац кодта «Алгъуызы кадӕг» дӕр. Абайты Васо стыр аргъ кодта ирон поэты куыстытӕн, куыд дунейы ӕвзӕгтӕм ацы рагон уацмысты тӕлмӕцтӕй иууыл ӕххӕстгондӕртыл, афтӕ. Ратӕлмац ма кодта аивадон литературӕйы дӕсгай ӕндӕр шедевртӕ дӕр. Фӕлӕ ирон литературӕйы историйы баззад куыд иттӕг хорз дӕсны, кӕцы йӕхи сӕрмагонд уацмысты раргом кодта мадӕлон ӕвзаджы хъӕздыгдзинад ӕмӕ рӕсугъддзинад.
Чиныджы автор, Хуссар Ирыстоны фыццаг президент Цыбырты Людвиг, Бестауты Георгийы сфӕлдыстады тыххӕй дзургӕйӕ банысан кодта, зӕгъгӕ, уый адӕмы мысынады баззайдзӕн куыд стыр поэт, афтӕ. «Георгиимӕ мах тынг хӕлар уыдыстӕм, уыцы иурӕстӕджы каст фестӕм уӕлдӕр ахуыртӕ, цардыстӕм иу уынджы. Ме ‘ввахс хӕлары тыххӕй цы чиныг рауагътон, уый бацӕттӕ кӕнынӕн мын баххуыс кодта йӕ чызг Залинӕ ӕмӕ йын зӕгъын бузныджы ныхӕстӕ», – банысан кодта Цыбырты Людвиг.