Общество

Кæд бæрæг кæнæм Хетæджы Уастырджийы бон?

Фарн уæм бадзурæд, нæ Ирыстоны адæм!

Æрхæццæ кæны не стырдæр бæрæгбæттæй иу — Хетæджы Уастырджийы бон. Куыд зонæм, афтæмæй æрвыл аз дзырддаг вæййы, бæрæгбон кæцы бонмæ цæуы, уыцы фарста. Мыхуыргонд цæуынц иугай лæгты зондæй арæзт къæлиндартæ, æмæ уыдон дæр адæмы цымыдисы æфтауынц. «Иры Стыр Ныхас» æртæ азы дæргъы архайдта, цæмæй сæрмагонд къамисæй, чи зоны бæрæгбæтты фæтк, уыдоны иумæйаг зондæй, рауадзæм иу къæлиндар æмæ уый фæрцы адæм иу зонд, иу фæткмæ æрцæуой.

Хъыгагæн, кæд уыцы хъуыды вазыгджын æмæ дызæрдыггаг нæу, уæддæр йæ сæххæст кæнынæй ницы рауад. Ныры рæстæг, стæмтæй фæстæмæ, иумæ бакусынæй алчи йæхи иуварс ласы (ома, æз мæхæдæг къæдзæх дæн, искæй зондыл цæмæн разы кæнон). Фæзынд нæм алыхуызон æхсæнадон организацитæ дæр, кæцытæ иннæтимæ æмгуыст кæныныл разы не сты.

Цæвиттон, ацы аз бæрæгбон кæд кæнгæ у, уыцы фарста равзарыны хъуыддаг Дзуары бын æвзæрст лæггадгæнджыты бар бакодтам. Æнæуи дæр, Æгъдаумæ гæсгæ, хъуамæ афтæ уа. Хъæутæй сæ равзарынц афæдзмæ, æмæ бæрæгбон скæнын у сæ сæйрагдæр хæс. Уыдон æрæджы æрфарстой, Тымбыл Хъæды алыварс цы хъæутæ ис, уыдоны дзырддзæугæ хистæрты, æмæ уыцы бындурыл рахастой сæ уынаффæ: 2021 аз Хетæджы Уастырджийы бон бæрæггонд цæудзæн сусæны мæйы дыккаг хуыцаубон — 11-æм боны (11.07.2021).

Цалдæр къæлиндары уыцы бæрæгбон нысангонд у фыццаг хуыцаубоны, æмæ кæд 4 июлы чидæртæ бацæуой Хетæджы Къохмæ се’ртæ кæрдзыны скувынмæ, уæд уым æппындæр æвзæрæй ницы ис.

Ис нæм куырдиат. Уæ хорзæхæй, Дзуары бынмæ йæхи ирхæфсынмæ мачи цæуæд. Уый фæлладуадзæн бынат нæу, фыдæлтæй нырмæ йæм адæм цыдысты кувынмæ. Иры Стыр Ныхасы хъæппæрисæй фæстаг æртæ азы куыд ныффидар, æмæ Æгъдау куыд домы, афтæмæй Дзуары бын уыцы бон нæ уыдзæн концерттæ æмæ æххуырсгæ артистты архайд. Хи зондæй ирон хъазт чи сараза, ирон зарæгæй куывд чи барæсугъд кæна, уыдонæн-иу Уастырджи хорз арфæ ракæнæд!

Ивгъуыд азты фæткмæ гæсгæ, курæм, цæмæй Дзуары бынмæ карз нозт мачи хæccа, мачи дзы
судза мыдадзын цырæгътæ. Дзуары бынмæ цæуынвæнд чи скæна, уый йæ зæрдыл дарæд, æгъдаумæ гæсгæ, йæ уæлæдарæс, йæ æддаг бакастмæ сæрмагонд домæнтæ кæй ис. Нæлгоймагæн æмбæлы цæуын фæлурс даргъдыс хæдоны. Сылгоймæгтæ мидæмæ, Къохмæ, куы нæ цæуой, уæд — хуыздæр. Йæ алфамбылай та æмбæлы уæвын фæлурс даргъдыс къабайы, сæрыл сæрбæттæнимæ.

Нæлгоймаг Дзуары бынмæ цæуы æмæ уым кувы худаистæй. Уæ хорзæхæй, ма дзы нуазут карз нозтытæ, ма кæнут дæргъвæтин бадт. Дзуар, агуывзæйы мидæг цал градусы ис, уымæ нæ кæсы — сыгъдæгзæрдæйæ йæм кувут хæдзары конд æртæ кæрдзыны æмæ ирон бæгæныйæ. Уыимæ, Дзуары бын нæй дымæн тамако, æнæуаг ныхас кæнæн. Дзуары бынмæ цæуыны размæ, раст у иу цалдæр боны ком бадарын, уд æмæ буар ссыгъдæг кæнынæн.

Уыимæ, æгас дунейыл чи сыстад, уыцы рынæй нырма тас кæй у, уымæ гæсгæ сидæм, цæмæй Дзуары бынмæ цæуджытæ сæхи бахизой, домæнтæ æмæ уагæвæрд æххæст кæной. Алы хъæубæcты æмæ сыхбæсты хистæртæй дæр курæм, цæмæй се ‘мхъæуккæгтæм фæсидой, ныффæдзæхсой сын, Къохы уæрæх фынгæвæрдтæ куыд нæ уа уыцы бон. Адæмы æнæниздзинад æмæ æдасдзинад у æппæты ахсджиагдæр.

Хетæджы Уастырджийы хорзæх уæд нæ Ирыстоны адæмы! 

КУЧИТЫ Руслан,
«Иры Стыр Ныхас»-ы сæрдар

Похожие записи:

Новости

С военным билетом на престижную работу

Призыв граждан на военную службу всегда взаимосвязан с получением военного билета.

Общество

Открылся прием заявок на участие в онлайн-шествии Бессмертного полка

Началась подача заявок на участие в шествии “Бессмертного полка онлайн”.

Общество

«Краткий осетинский мифологический словарь»

Перед Новым годом  вышел в свет «Краткий осетинский мифологический словарь».

Общество

Профессиональные старты на «Абилимпикс-2021»

На базе Владикавказского торгово-экономического техникума состоялось открытие V регионального чемпионата

Общество

«Сезонной нехватки воды быть не должно»

Такую задачу поставил врио Главы РСО-А Сергей Меняйло в ходе аппаратного совещания по итогам минувшей недели.

Общество

Пить или не пить?

В здании городской администрации состоялся круглый стол на тему «Пути решения проблем незаконной реализации алкогольной продукции».

Все новости из категории:Общество