Куыд æхцон вæййы зæрдæйæн, не ʼмтуг ирон адæймæгты сгуыхтдзинæдты тыххæй нæм куы æрыхъуысы, кæнæ та сын се ʼнтыстытæн нæхи цæстæй æвдисæн куы фæвæййæм, уæд. Ахæм рæстæджыты нæ зæрдæтæ цины малы аныгъуылынц, сæрыстырдзинады æнкъарæнтæй байдзаг вæййынц. Ирыстоны зæхх хъæздыг у ахæм гуырдтæй, кæцытæн сæ хорзы кой айхъуысы æнæхъæн дунейыл æмæ афтæмæй сæ архайд, се сгуыхтдзинæдтæй скад кæнынц, куыд сæхицæн, афтæ сæ радтæг Ирыстонæн дæр.
Нæлгоймаджы хæстæ бирæ сты, фæлæ сæ сæйрагдæр æмæ кадджындæр у Фыдыбæстæ хъахъхъæнын. Нæ бæстæйы адæм февралы мæйы 23-æм бон кадджын уавæры фæбæрæг кæнынц Фыдыбæстæ хъахъхъæнæджы бон. Уый у, йæ райгуырæн зæхх æмæ йæ адæмы чи бахъахъхъæдта æмæ сæ бахъахъхъæнынмæ æдзухдæр цæттæ чи у, уыцы нæлгоймæгты æмæ сылгоймæгты бæрæгбон. Ныры дуджы та Фыдыбæстæйы раз йæ хæстæ цæсгомджынæй чи æххæст кæны, ахæмтæ чысыл нæй. Уымæн ирд æвдисæн Уæрæсейы Федераци цы сæрмагонд операци уадзы, уый.
Куыд зонæм, афтæмæй Донбассы цæрджыты нацисттæй ссæрибар кæныны охыл нæ иумæйаг Ирыстон исы активон хайад. Нацизм скуынæг кæнын æнæмæнг хъуыддаг у, уымæн æмæ уæд цард йæ гаччы ʼрбаддзæн, куыд æмбæлы, афтæ. Уымæ гæсгæ нæ иумæйаг тыхтæ ныртæккæ здæхт сты ацы операцимæ. Хъыгагæн, ныхмæлæуд æнæ уды зиан нæ вæййы. Нæ чысыл Ирыстон дæр æвзары уæззау рæстæг уыцы хъуыддаджы – нæ хуыздæр, цардмондаг лæппуты зиантæ махæн уæззау трагеди сты алкæмæндæр. Донбассы зæххыл сабырады охыл чи тох кæнынц, уыцы ирыстойнаг лæппуты нæмттæ махæй никуы уыдзысты рох.
Ирыстонæй Донбассы цæрджыты бахъахъхъæнынмæ цы лæппутæ ацыд æмæ цæуы, уыдонæй чи йæ комкоммæ хæстæ, чи та йæ уд æмæ зæрдæйы хъæрмæ гæсгæ зонынц, цы у хæст æмæ кæдæм цæуынц.
Ирыстойнаг бархионтæй Донбассы цæрджыты бахъахъхъæныны сæрмагонд операцийы хайад чи исы, уыдон хорзæхджын цæуынц Донецк æмæ Луганскы Адæмон Республикæты паддзахадон хорзæхтæй.
Ацы бонты Уæрæсейы телеуынынады 1-аг каналы «Ног хабæрттæм» чи каст, уый æнæмæнг федтаид ирон хæстон Кæркуысты Эричы къам. Сæрмагонд æфсæддон операцийы капитан Кæркуысы-фырт æххæст кодта размæбырсæг уæрæсейаг дæлхæйтты артагæй сифтонг кæныны фæдыл хæслæвæрд. Уæрæсейы гæрзифтонг тыхты батальоны тактикон къорды дæлхæйтты техникæйы артаг кæныны рæстæджы сын ныхмæлæууæг бафæлвæрдта сæ позицитæ ныббырсын. Арæхстджынæй командæ кодта йæ дæлбар къорды хæстонтыл æмæ йæ архæйдтыты фæрцы украинæйаг националистты размæбырст фæсыкк. Бантыст сын сæ техникæ æдас районмæ раласын. Диверсанттæ фæстæмæ алæууыдысты стыр зиантæ сыл æрцыд, афтæмæй.
Капитан Кæркуысты Эрикы хъайтардзинад æмæ æхсардзинады фæрцы хисæрмагонд скондыл уды зиан не ʼрцыд. Знагæн нæ бантыст уæрæсейаг дæлхайы техникæ скуынæг кæнын.
Кæркуысы-фырт бирæ хæттыты куыста ныхмæлæууæджы территоримæ хæрзæввахс полчъы сæйраг тыхты артаджы-сæрдæн æрмæджытæй ӕнӕкъуылымпыйӕ сифтонг кæныны тыххæй. Капитан Кæркуысты Эрик, сæрмагондæй, йæхæдæг материалон фæрæзтæ ласта фронты раззаг хахмæ.
Хуссарирыстойнаг æфсæддон службæгæнæг Наниты Батрадз хорзæхджын æрцыд Сыгъдæг Георгийы орден – 4-æм къæпхæны Георгийы дзуарæй. Ирон хæстонæн уый размæ та саккаг кодтой Уæрæсейы Федерацийы паддзахадон хорзæх — «За воинскую доблесть»-ы майдан сæрмагонд æфсæддон операцийы зонæйы хæстон архæйдтыты рæстæджы равдисгæ æхсардзинады тыххæй.
Наниты Батрадз у Уæрæсейы Федерацийы 4-æм æфсæддон базæйы æфсæддон службæгæнæг. Сæрмагонд æфсæддон операцийы ис ивгъуыд азы мартъийæ фæстæмæ.
Лейтенант Гулчеты Азæмæты схорзæхджын кодтой «За спасение погибавших»-ы майданæй. Хицæн развæдсгарæн батальоны медицинон службæйы хистæр, Цыколайы хъæуккаг ныртæккæ ис сæрмагонд æфсæддон операцийы зонæйы. Дæсны медицинон æххуыс бакæныны æмæ йе ʼмслужбæгæнджыты цард аирвæзын кæныны, афтæ ма йын удуæлдайдзинад æмæ уæндондзинад равдисыны тыххæй йын саккаг кодтой паддзахадон хорзæх.
Бикойты Алим Русланы фырт УФ-йы Президенты Барамындæй хорзæхджын æрцыд Жуковы майданæй сæрмагонд æфсæддон операцийы равдисгæ стыр хъайтардзинады тыххæй. Уый размæ та йын Владимир Путины Барамындæй саккаг кодтой Суворовы майдан. Хорзæхджын ма у «За отвагу»-йы майдан æмæ æндæр паддзахадон хорзæхтæй.
Дзæуджыхъæуккаг Баситы Тимур Станиславы фырт хорзæхджын æрцыд «За отвагу»-йы майданæй сæрмагонд æфсæддон операцийы равдисгæ хъæбатырдзинады тыххæй. Æфсæддон службæгæнджыты, мидхъуыддæгты органты кусджыты, æххæстгæнæг хицауиуæгады æндæр федералон органты кусджыты ацы майданæй хорзæхджын кæнынц тохты, паддзахадон æдасдзинад сифтонг кæныны фæдыл сæрмагонд хæслæвæрд æххæст кæныны рæстæджы хисæрмагонд хъайтардзинады тыххæй.
Цæгатирыстойнаг æфсæддон службæгæнæг, прапорщик Хъараты Аслан Алыксийы фырт дæр хорзæхджын æрцыд Сыгъдæг Георгийы орден – 4-æм къæпхæны Георгийы дзуарæй знаджы артиллерийы æхстыты бын йæ удæн тæссаг уавæрты æхсæн позицитæм хæстон æрмæджытæ кæй баласта, уый тыххæй.
Нæ зынаргъ Фыдыбæстæ хъахъхъæнджытæ! Ныртæккæйы хуызæн нæ никуы хъæуы уæ ныфс æмæ хъару, уымæ гæсгæ уын Хуыцауы цæст бауарзæд фидар æнæниздзинад, бинонты фидар ныфс, стыр æнтыстытæ уæ зын куысты Уæрæсейы хæрзиуæгæн.
Зæххыл уæд сабырад æмæ кæрæдзиæмбарынад! Уадз æмæ сабыр цардарæзты цæуæд хорзæхджын æрмæст не ʼмбæстæгтæ нæ, фæлæ æппæт зæххы къорийы адæм дæр.
КЪУДУХТЫ Маринæ