Æмдзæвгæтæ, мысинæгтæ, номдзыд режиссерæн одæ. Мыхуыры рацыд чиныг «В плену прекрасных муз». Ныхас дзы цæуы Евгений Вахтанговы царды æмæ сфæлдыстадон фæндаджы тыххæй. Зындгонд режиссер у Мæскуыйы Старый Арбаты æмном театры бындурæвæрæг, райгуырд та Дзæуджыхъæуы. Ацы аз нæ республикæйы сæйраг горæты, егъау реконструкцийы фæстæ байгом кодтой «Вахтанговы хæдзар-музей».
Уæрæсейы сгуыхт ахуыргæнæг Биазырты Валентинæ æмæ Цæгат Ирыстоны журналистты цæдисы сæрдар, паддзахадон телерадиокомпани «Алани»-йы директор Хъуысаты Тимур цы чиныг ныффыстой, уый баст у йæ хæдзармæ курдиатджын режиссеры æрыздæхтимæ
Адæймагмæ афтæ фæкæсдзæн, цыма ацы хуызисты астæуæй цы лæппу ис, уый ас лæг у – мидисджын цæстæнгасимæ. Фæлæ уæд, 1889 азы нæма зыдта, йæ цард цы цымыдисаг æмæ рæсугъд уыдзæн, стæй йыл цас æмдзæвгæтæ æмæ чингуытæ ныффысдзысты, уый. Уыдонæй алкæцы дæр – уарзондзинады ныстуан. Аив музæты уацары чи бахауд, æмæ æцæг аивад чи фæлдыста, уымæн. Биазырты Валентинæйы æмæ Хъуысаты Тимуры чиныг цыма ноджыдæр иу æвдисæн у республикæйы ахсджиаг цауæн – Вахтангов æрыздæхт йæ хæдзармæ.
Йæ чиныгыл Биазырты Валентинæ куыста æхсæвæй-бонæй æвæллайгæйæ. Автор дзы бауагъта йæ уды хъарм. Æвæццæгæн, уымæн рауад ахæм зæрдæмæисгæ. Комкоммæ йæ чи зоны, уыдоны ныхæстæм гæсгæ, йæ бон æндæрхуызон нæу. Ларисӕ Сюняевайы хæстæг уыд Биазырты Валентинæйæн ахуыргæнæг. Дзырдта-иу, нырма æвзонг чызгæй йæ арæхстдзинадæй дисы куыд æфтыдта, уый тыххæй.
Æмдзæвгæтæ, уацтæ, документтæ. Аргъ скæнæн кæмæн нæй, ахæм адæймаджы тыххæй зынаргъ æрмæджыты æмбырдгонд æмæ у Вахтанговмæ æмæ, æмткæй райсгæйæ, аивадмæ уарзондзинадæй æххæст. Чиныг сцæттæ цыбыр рæстæгмæ. Уæрæсейы сгуыхт ахуыргæнæг, бæстæйы журналистты цæдисы уæнг, Дзæуджыхъæуы кадджын æмбæстаг Биазырты Валентинæ дзы дзуры йæхи номæй нæ, фæлæ Евгений Вахтанговæн æгæронæй чи арфæ кæны, уыцы адæмы номæй.
«Он вернулся домой, он пришел после долгой разлуки…». Алы рæнхъ дæр, номдзыд режиссер зынаргъ кæмæн сси, уыцы зæрдæйæ фыст.
Æрмæг бацæттæ кодта КЪУДУХТЫ Маринæ