Цæгат Ирыстоны æрымысыдысты 1992 азы зæрдæриссæн цаутæ
31 аз рацыд Горӕтгӕрон районы мӕхъӕлон- ирон быцӕу куы ‘рцыд, уӕдӕй. Фӕлӕ абон дӕр рох не сты Фыдыбӕстæйы сӕраппонд йӕ цард чи нӕ бавгъау кодта, уыцы хъайтарты нӕмттӕ… Уыцы тугуарæн бонты Ирыстоны æхсарджын фырттæй бирæтæ сæ удтæ нывондæн æрхастой нæ Иры сæрвæлтау æмæ сæ риутæй бахъахъхъæдтой нæ фыдæлты зæхх.
Ахæм хъæбатыртæ æнусмæ æрæнцадысты Октябрыхъæуы æфсымæрон уæлмæрды æмæ Дзæуджыхъæуы Намысы аллейы. Зæрдæ риссы Ирыстоны зынгхуыст хъæбултыл, фæлæ сæрыстырдзинады æнкъарæнтæ фылдæр æвзæры нæ зæрдæты, æгайтма нæм ахæм сæрæнгуырдтæ ис.
Знон, 30 октябры, Дзæуджыхъæуы Намысы аллейы нæ æдзард хъæбатырты ингæнтыл дидинджытæ сæвæрдтой Республикæ Цæгат Ирыстон – Аланийы Сæргълæууæг Сергей Меняйло, Парламенты сæрдар Тускъаты Таймураз, Дзæуджыхъæуы муниципалон сконды сæргълæууæг Алыксандр Пациорин, Дзæуджыхъæуы сахары хиуынаффæйады бынæттон администрацийы сæргълæууæг Милдзыхты Вячеслав, æхсæнадон æмæ дины организациты минæвæрттæ, æдзард лæппуты хиуæттæ æмæ хæстæджытæ, се ‘мтохгæнджытæ, хуымæтæг адæм æмæ сын иу минут æдзæмæй алæууынæй æрымысыдысты сæ рухс нæмттæ.
РЦИ-Аланийы Хицауады Сæрдар Дзанайты Барис уыцы мысæн бон, Октябрыхъæуы æфсымæрон уæлмæрды цы номарæн мадзал ацыд, уым Ирыстоны хъахъхъæнгæйæ йæ цард чи радта, уыцы сахъгуырдтæн загъта: «Рухсаг ут…»
Хуыцау зæгъæд, æмæ ахæм тугкалæн цаутæ нæ дидинæгкалæг зæххыл куыд никуыуал æрцæуой, нæ адæмты ‘хсæн хæлардзинад фидарæй фидардæр куыд кæна!
КЪУДУХТЫ Маринæ