1–3 сентябры – Ирыстоны стыр хъыджы бонтæ
Беслæны 1-æм скъолайы райдайдзæн æртæбонон зæрдылдарæн вахтæ 2004 азы террористон акты амæттæгтыл.
20 азы фæстæ та 1-æм сентябры ацы скъолайы ногæй баиу уыдзысты дзæнгæрæджы зæрдæскъуынæн зæлтæ, ирон мадæлты зæрдæхалæн хъарджытæ æмæ ирон адæмы кæуын.
Скъолайы кæрты æнустæм æрбынат кодтой зæрдæйы маст, катай, хъыг, рис æмæ цæссыг. Фæдзурынц, зæгъгæ, дам, рæстæг зæрдæйы хъæдгæмттæ æгасгæнæг у, фæлæ уый бынтон афтæ нæу, уымæн æмæ Беслæны террористты къухæй цы суинаг удтæ бабын сты, уыдоны æвирхъау амæлæтыл цас фылдæр рæстæг цæуы, уыйас тыхджындæр кæны сæ бинонты, Ирыстоны дзыллæты зæрдæты рыст. Судзгæ рыстæн кæрон нæй æмæ йын, æвæццæгæн, никуы дæр уыдзæн. Сентябры ацы æртæ тугхъулон боны æнустæм баззайдзысты ирон адæмы историйы. Нæй уыцы æртæ тугуарæн бонæн ферох кæнæн. 1–3 сентябры æлгъыстаджы скъолайы спортзалы къултыл фæмардуæвджыты къамтæм кæсгæйæ та адæймаджы зæрдæ уæлдай тынгдæр срисдзæн, æмæ та адæм æнæвгъауæй сæ цæссыг калдзысты. Сæ хъæбулты чи фесæфта, уыцы ныййарæг мадæлты хъарджытæм та, æвæццæгæн, æппæт уыцы тæригъæдтæн æвдисæн чи систы, скъолайы уыцы сыгъд къултæ дæр кæудзысты. Нæй ферох кæнæн, террористон зындоны арты чи бацарæфтыд, уыцы 334 зынгхуыст адæймагæн, уыдонæй 186 уыдысты сабитæ, иннæтæ та – ахуыргæнджытæ, ныййарджытæ, хотæ, æфсымæртæ, нанатæ æмæ дадатæ. Нæй ферох кæнæн «Альфæ» æмæ «Вымпел»-ы зынгхуыст ирвæзынгæнджыты. Сæ хъæбатырдзинад æнустæм цæрдзæн адæмы зæрдæты.
Ацы æвирхъау трагедийæ кæд 20 азы рацыд, уæддæр махæй алкæй зæрдыл дæр лæууы, раст цыма знон уыд, афтæ. Уыцы зæрдæскъуынæн нывтæм кæсгæйæ, ныр 20 азы фæстæ дæр цæссыгтæ фемæхсынц æнæвгъауæй.
Æппæт дунейы историйы бирæ æрцыд хæстытæ, фыдракæндтæ, фæлæ дзы Беслӕны æвирхъау фыдбылызы хуызæн нæ уыд. Ирон лæг алцæмæн дæр бабыхста, фæразон разынд. Фæлæ йæ Беслӕны фыдракæнд фæцудын кодта, йæ цæстытыл фæзынд цæссыг, нæлгоймаджы цæссыг!
Абон Беслæны теракты чи бахаудта, уыцы лæппутæ æмæ чызджытæй бирæтæн ис сывæллæттæ, кæд сын сæ зæрдæты сау фæд ныууагъта трагеди, уæддæр цард дарддæр цæуы знæгты фыдæнæн.
КЪУДУХТЫ Маринæ