Беслæны 1-æм скъолайы райдыдта æртæбонон вахтæ 2004 азы террористон акты амæттæгты фæдыл. Æртæ мысæн боны æнустæм, сагъæссаг бонтæй баззадысты Иры дзыллæ æмæ æппæт дунейы рæстаг адæмы зæрдæты. 19 азы размæ Ирыстоныл æрцыд, адæймаджы сæрымагъз кæй нæ ахсы, ахæм æвирхъау трагеди. Æрцыдис, дунейы мидæг чи никуыма уыдис, ахæм фыдохы хъаймæт!
Мысæн бонтæ ацæудзысты куыд Беслæны фыццæгæм скъолайы, афтæ ма мемориалон комплекс «Зæдты горæты» фæзуаты. Æрвыл изæр æртæ боны дæргъы скъолайы кæрты судздзысты мысæн цырæгътæ. 1–3 сентябры уыцы æлгъыстаджы скъолайы спортзалы къултыл цы къамтæ ис, уыдонмæ кæсгæйæ та адæймаджы зæрдæ уæлдай тынгдæр рисдзæн, адæм та æнæвгъау сæ цæссыг калдзысты се ʼдзард сабитыл. Сæ хъæбулты чи фесæфта, уыцы ныййарæг мадæлты хъарджытæм та, æппæт уыцы тæригъæдтæн æвдисæн чи систы, уыцы скъолайы сыгъд къултæ дæр кæудзысты.
1 сентябры 2004 азы террористтæ бацахстой Беслæны фыццæгæм скъола æмæ амынæты систой 1128 адæймаджы, кæцыты æртæ боны дæргъы хъизæмарæй мардтой. 3-æм сентябры 13 сахаты æмæ 5 минутыл Беслæны 1-æм скъолайæ райхъуыст фыццаг срæмыгъд æмæ уыимæ ирон адæмы кæуын æмæ хъарæг дæр азæлыдысты.
Беслæны трагедийы фыдгæнджыты къухтæй фæмард сты 334 адæймаджы…
Беслæны 1-æм скъолайы скъоладзаутæн зонындзинæдтæм хонæн дзæнгæрæджы бæсты сæ сæртыл туджы зæйтæ ранхъæвзт. Иры адæм сæ сабиты цард, цин æмæ хъæлдзæг худтæй бавдæлон сты. Ацы скъолайы кæрты æнустæм æрбынат кодтой зæрдæйы маст, катай, хъыг, рис æмæ цæссыг.
Тугдзых лæгсырдтæ бахъавыдысты нæ зæрдæйы уидæгтæм, нæ сабитæм, нæ фидæнмæ. Фыдгæнджытæ сабиты æхстой разæй æмæ чъылдымæрдыгæй, мардтой, сæ ныхмæ хъæддыхæй чи лæууыд, уыцы нæлгоймæгты æмæ сын сæ мæрдтæ æддæмæ рудзгуытæй калдтой.
Никуы ферох уыдзысты, террористон фыдракæнды чи фæмард сты, уыцы адæм, уæлдайдæр та се ʼхсæн цы 186 сывæллоны уыдис, уыдон, афтæ ма сæм ирвæзын кæнынмæ чи фæзындысты, уыцы «Альфа» æмæ «Вымпел»-ы хъайтар лæппутæ.
Иры бæсты ахæм бинонтæ нæ баззадис, æвирхъау бæллæх кæй нæ фæриссын кодта.
Нæ буц хистæртæй бирæтæ зæрдæскъуыд фесты æвзонг удты тæригъæдæй æмæ развæлгъау се ʼнусон бынатмæ ацыдысты. Сентябры ацы æртæ тугхъулон боны æнустæм баззайдзысты ирон адæмы историйы.
Рæстæг, дам, зæрдæйы хъæдгæмттæ дзæбæхгæнæг у, фæзæгъынц, фæлæ ацы зæрдæвæрæн ныхасыл куыд ис баууæндæн, кæд æмæ, Беслæны æнаххосæй террористты къухæй чи фесæфт, уыдоныл цас фылдæр рæстæг цæуы, уыйас сæ бинонты, Иры дзыллæйы зæрдæниз тыхджынæй-тыхджындæр кæны, дудгæ рыстæн кæрон нæй æмæ йын нæдæр уыдзæн. Ацы фыдохы тугуарæн бонтæ ирон адæмы историйы баззайдзысты æнустæм æлгъыстаг туглæсæны сау бонтæй. Кæмæн цы кодтой, æнаххосæй зæххон зæдтæ, цæмæн бабын сты, «дон-дон» кæнгæйæ?
19 азы дæргъы Ирыстон сахуыр ацы рыстимæ цæрын, фæлæ табу Хуыцауæн, Беслæн нæ амард, горæт цæры æмæ цæрдзæн! Сывæллæттæ гуырынц æмæ уый та нысан кæны, цард дарддæр йæ цыды кой кæй кæны, уый.
Абон Беслæны теракты чи бахаудта, уыцы лæппутæ æмæ чызджытæй бирæтæн ис сывæллæттæ, кæд сын сæ зæрдæты сау фæд ныууагъта трагеди, уæддæр цард дарддæр кæны знæгты фыдæнæн. Ирон адæм хъуамæ цæрой æмзонд æмæ æнгомæй! Хуыцау нæ не знæгты фæндиаг макуы фæкæнæд!
Уæ зæрдæйы хорзæх уæ уæд, Ирыстоны рыст адæм! Царды хур уæ батавæд йæ фæлмæн тынтæй.
КЪУДУХТЫ Маринæ