Стъараполы ацы бонты бæрæг кæнынц «Уæрæсейы Хуссары цæрæг адæмты культурæ æмæ спорты фестиваль». Ирыстонæй дзы архайы сæрмагонд делегаци. Фестиваль бæрæг кæнынц цыппæрдæсæм хатт.
Ацы аз дзы архайы иннæ хæттытæй фылдæр адæм. Æдæппæтæй 19 субъекты. Уыдонимæ Донецк, Луганскы адæмон республикæтæ æмæ Запорожьейы æмæ Херсоны облæстытæ. Нæ республикæ сæрмагонд темæйæн равзæрста — Нарты кадджытæ! Куыд зонæм, афтæмæй 2023 аз Цæгат Ирыстоны нымад у ирон «Нартиадæ»-йы азыл.
Нарты кадджытæ сты ирон адæмы энциклопеди, нæ аивады истори. Сæдæгай азты дæргъы нæ фыдæлтæ цы уыдтой сæ алыварс, цы зыдтой, цы хъуыды кодтой æмæ цæмæ бæллыдысты, уыдон иууылдæр æвдыст æрцыдысты эпосы.
Мæнæ сын куыд аргъ кодта нæ уарзон фыссæг, поэт, ирон литературæ иртасæг, профессор Джыккайты Шамил: «„Нарты кадджытæ“ сты хъæбатырон эпос. Æвдыст сæ цæуы бæгъатырты тох æмæ сгуыхтытæ. Уыдон сты аив æмæ цымыдисаг таурæгътæ, хъусæн æнцон, зæрдæйæн – æхсызгон, адæймагæн хæссынц цин, æфтауынц æй сагъæстыл æмæ уæздан хъуыдытыл».
Алы адæймаг дæр хъуамæ зона йæ адæмы æгъдæуттæ, æххæст сæ кæна, уымæн æмæ уыдон сты адæмы æхсæнадон, культурон, æрвылбоны царды фæлтæрддзинад æвдисæн.
Стъараполы фестиваль ма иу хатт æвдисæн у, республикæйы адæмон аивад æмæ этнокультурон бирæхуызондзинад, уыимæ историон-культурон бынтæ кæй цæуынц хъахъхъæд, уыцы æууæлæн.
Фестивалы архайджытæ саив кодтой фæз æмæ йын декорацитæ сарæзтой Дзанайты Азанбеджы номыл аивæдты училищæйы ахуыргæнджытæ æмæ студенттæ, стæй Тауаситы Сосланы номыл Сывæллæтты аивадон скъолайы ахуырдзаутæ.
Нæ фæсивæд сæхи фæлварынц алы хуызы ерысты, суанг ма сарæзтой хъазтизæр дæр.
КЪУДУХТЫ Маринæ