Украинæйы цы сæрмагонд æфсæддон операци цæуы, уым фыццаг бонтæй фæстæмæ Ирыстоны лæппутæ тох кæнынц сæ бæстæйы сæрибардзинадыл, хъахъхъæнынц сабыр цæрджыты неофашисттæй.
Уыдон сæ размæ æвæрд хæстæ æххæст кæнынц бæрнонæй, сæхиуыл æнæауæрдгæйæ, æвдисынц диссаджы сгуыхтдзинæдтæ. Нæ хæстонтæй канд сæ къабæзтæ нæ, фæлæ æгас Ир дæр сты сæрыстыр. Нæ лæппутæ се ʼппæт дæр сты стыр хорзæхты аккаг. Уыдон та æнцонтæй кæй нæ дæттынц, уый алчидæр зоны.
Зынаргъ газеткæсджытæ, абон уæ базонгæ кæндзыстæм, сæрмагонд æфсæддон операцийы хъайтардзинад чи æвдисы æмæ паддзахадон хорзæхтæ чи райста, уыдонæй цалдæримæ.
2-æм августы Кремлы залы уыд паддзахадон хорзæхтæ раттыны цытджын æмбырд. Хорзæхтæ кадджын уавæры лæвæрдта Президент Владимир Путин. Хъæбатырдзинады орденæй хорзæхджын æрцыд РЦИ-Аланийы Мæздæджы цæрæг Гериты Инал Артуры фырт.
Хуссарирыстойнаг хæстон Тыджыты Алексей Уырызмæджы фырт Президент Владимир Путины барамындæй хорзæхджын æрцыд Хъæбатырдзинады орденæй сæрмагонд æфсæддон операцийы æхсардзинад æмæ удуæлдайдзинад кæй равдыста, уый тыххæй.
Æхсардзинад равдисыны æмæ расчетты дырысдзинады тыххæй хуссарирыстойнаг хæстон Дзигойты Сослан Ромикы фырт хорзæхджын æрцыд УФ-йы Хъахъхъæнынады орден «За боевые отличия»-йæ.
Хуссарирыстойнаг Джиджойты Сослан Димитры фырт хорзæхджын æрцыд Жуковы майданæй удуæлдайдзинад æмæ хисæрмагонд хъæбатырдзинад равдисыны тыххæй.
Уалыты Тимур Алыбеджы фырт Президент Владимир Путины барамындæй хорзæхджын æрцыд Жуковы майданæй сæрмагонд æфсæддон операцийы хæстон архӕйдтыты рæстæджы равдисгæ удуæлдайдзинад æмæ хисæрмагонд хъæбатырдзинады тыххæй.
Уæрæсейы Федерацийы Уæлдæр Сæйраг командæгæнæг Владимир Путины барамындæй РЦИ-Аланийы Виноградныйы хъæуы цæрæг Багаты Дианæ Валикойы чызг хорзæхджын æрцыд «За спасение погибавших»-ы майданæй. Дианæ февралы мæйæ фæстæмæ ис фронты раззаг хаххы æмæ ирвæзын кæны нæ салдæтты цард.
Хуссарирыстойнаг хæстон Гаглойты Сæрмæт Дудары фыртæн Уæрæсейы Президент Владимир Путины барамындæй саккаг кодтой Жуковы майдан сæрмагонд æфсæддон операцийы равдисгæ сгуыхтдзинæдты тыххæй.
Батальон «Шторм Осетия»-йы хæстон Гаугаты Алан (йæ фæсномыг «Марокканец») карз тохы рæстæджы равдисгæ æхсардзинад æмæ удуæлдайдзинады тыххæй хорзæхджын æрцыд Жуковы майданæй.
РЦИ-Аланийы Сæргълæууæг Сергей Меняйло «Ирыстоны намысæн»-ы майданæй схорзæхджын кодта батальон «Шторм.Осетия»-йы командиры хæдивæг Плиты Денисы (йæ фæсномыг «Дикий») сæрмагонд æфсæддон операцийы цæрæн пункт Пятихаткайы тохты рæстæджы равдисгæ фидардзинад æмæ удуæлдайдзинады тыххæй.
Уæрæсейы Федерацийы Президент Владимир Путины барамындæй хуссарирыстойнаг хæстон Лолоты Вадим Павелы фыртæн саккаг кодта Жуковы майдан хисæрмагонд хъæбатырдзинад æмæ удуæлдайдзинад равдисыны тыххæй.
Хуссарирыстойнаг хæстон Дыгъуызты Владислав Владимиры фырт УФ-йы президент Владимир Путины барамындæй хорзæхджын æрцыд Жуковы майданæй карз тохты рæстæджы равдисгæ æхсардзинад æмæ удуæлдайдзинады тыххæй. 4-æм уæрæсейаг æфсæддон базæйы æфсæддон службæгæнæг сæрмагонд æфсæддон операцийы хайад исы ивгъуыд азы мартъийы мæйæ фæстæмæ.
Ирыстойнаг æфсæддон дохтыр Бекъойты Владимир Оледжы фырт хорзæхджын æрцыд Жуковы майданæй. Владимир сæрмагонд æфсæддон операцийы хайад исы хæстон архӕйдтыты райдианæй фæстæмæ. Уый йæхи цардæн тæссаг уавæрты, бирæ хатт бахъуыд йе ʼмбæлтты цард ирвæзын кæнын.
Батальон «Шторм.Осетия»-йы хæстон Голлоты Альберт Нодары фырт сæрмагонд æфсæддон операцийы цæрæн пункт Пятихаткайы цур тохы равдисгæ æхсардзинады тыххæй РЦИ-Аланийы Сæргълæууæг Сергей Меняйлойы барамындæй хорзæхджын æрцыд «Ирыстоны намысæн»-ы майданæй. Хæстонæн хорзæх радта батальон «Шторм.Осетия»-йы командир «Король».