«Уæрæсейы культурæйы фонд»-ы грант æххæст кæнгæйæ, ахæм фестиваль арæзт æрцыд Дзæуджыхъæуы. Нæ горæтмæ сæ курдиат равдисынмæ ссыдысты сфæлдыстадон къордтæ алы республикæтæй. Фестиваль баиу кодта бирæ адæмы æмæ йæ нысан сæйраджыдæр уыд, уый.
Сфæлдыстадон къордтæ суазæг сты Дагестанæй, Цæцæны республикæйæ, Кæсæг-Балхъарæй, Абхазæй, Хуссар Ирыстонæй, стæй Цæгат Ирыстоны алы районтæй.
Архайджытæм æртæ боны дæргъы æнхъæлмæ каст цымыдисаг программæ. Фестиваль кадджын уавæры байгом кодтой Дзæуджыхъæуы Хетæгкаты Къостайы номыл центрон парчы.
Адæм федтой канд цымыдисаг равдыстытæ нæ, фæлæ ма алыхуызон республикæты национ уæлæдарæс дæр. Базонгæ сты Цæгат Ирыстоны националон культурæ æмæ æгъдæуттимæ. Бабæрæг кодтой Задалеск.
Уазджытæ уыдысты æвдисæн, фысымтæ фестивальмæ сæхи куыд тынг хорз бацæттæ кодтой, стæй аивад куыд иу кæны адæмы, уыимæ ма фæсивæды ʼхсæн культурæ парахат кæнын.
Фестивалы кæронбæттæны концерт радтой адæмон сфæлдыстады хæдзары. Уымæй уæлдай ма сарæзтой декоративон – æрмдæсныйады равдыст дæр. Цæгат Ирыстоны культурæйы министры хæдивæг Хъуыссæты Зæлинæ фестивалы архайджыты схорзæхджын кодта кады гæххæттытæй.
Зæгъæн ис, фестивалы сæйраг нысан – адæмыхæттыты ʼхсæн хæлар ахастдзинæдтæ тауын, архайджыты къухы кæй бафтыд.
КЪУДУХТЫ Маринæ